Անթույլատրելի է հայ-թուրքական հարաբերությունների կարգավորումը պայմանավորել ղարաբաղա-ադրբեջանական հակամարտության լուծմամբ: Այդ մասին հայտարարել է Հայաստանի ԱԺ փոխնախագահ Էդուարդ Շարմազանովը` արձագանքելով Թուրքիայի խորհրդարանի նախագահի հայտարարությանը:
Թուրքիայի ազգային մեծ ժողովի նախագահ Ջեմիլ Չիչեքը, երեկ ելույթ ունենալով Հեյդար Ալիեւի հիշատակին նվիրված համաժողովում, անդրադարձել է նաեւ հայ-թուրքական եւ հայ-ադրբեջանական հարաբերություններին: Նա մասնավորապես ասել է, թե Հայաստան-Թուրքիա հարաբերությունների կարգավորման պայմաններից մեկն Ադրբեջանի տարածքային ամբողջականության վերականգնումն է:
«Անթույլատրելի է հայ-թուրքական հարաբերությունների կարգավորումը պայմանավորել ղարաբաղա-ադրբեջանական հակամարտության լուծմամբ»,- նշել է Շարմազանովը` հավելելով, թե Թուրքիան այստեղ որեւէ անելիք չունի:
Անդրադառնալով Չիչեքի այն դիտարկումներին, թե Լեռնային Ղարաբաղի հիմնախնդիրը Կովկասի կայունությանը եւ խաղաղությանը սպառնացող ամենալուրջ հարցն է, եւ Թուրքիան սպասում է, որ հայկական քաղաքականությունն ազատվի սփյուռքի խնամակալությունից, ԱԺ փոխնախագահը հակադարձել է, թե տարածաշրջանային անվտանգության սպառնալիքի միակ պատճառը Թուրքիայի հովանավոր Ադրբեջանն է, որը քարոզում է հակահումանիստական արժեքներ:
Ի գիտություն Չիչեքի եւ ողջ թուրք-ադրբեջանական քարոզչամեքենայի՝ ԱԺ փոխնախագահ Էդուարդ Շարմազանովը նշել է, որ Հայաստանն ու սփյուռքը մեկ ընտանիք եւ միասնություն են: Նա հավելել է, որ անհեթեթ հայտարարություններով հանես գալու փոխարեն` արդարացի կլինի գիտակցել, որ Հայաստանն ու սփյուռքն ամեն ինչ անելու են Հայոց ցեղասպանության միջազգային դատապարտման ուղղությամբ:
Leave a Reply