Վալերի Բուայեն ցանկանում է պաշտպանել Ֆրանսիայի կողմից Հայոց ցեղասպանության ճանաչման մասին օրենքը

Ֆրանսիացի պատգամավոր, Հայոց ցեղասպանության հերքումը քրեականացնող օրինագծի հեղինակ Վալերի Բուայեն Ֆրանսիայի Ազգային ժողով է ներկայացրել երեք տեքստ՝ 2001թ. Ֆրանսիայի կողմից Հայոց ցեղասպանության ճանաչման մասին օրենքը պաշտպանելու նպատակով:
2012թ. դեկտեմբերի 13-ին նրա տարածած հայտարարությունում, որը հրապարակվել է «Nouvelles d’Arménie» ամսագրի կայքում, պատգամավորը մասնավորապես նշել է.
«Օրենքով ճանաչված` ցեղասպանությունների հերքումը քրեականացնող օրինագծի ընդունումից եւ Սահմանադրական խորհրդի գրաքննությունից հետո ես չհրաժարվեցի պայքարից:
Այդ իսկ պատճառով Ազգային ժողով եմ ներկայացրել երեք տեքստ՝ 2001թ. Ֆրանսիայի կողմից 1915թ. Հայոց ցեղասպանության պաշտոնական ճանաչման մասին օրենքը պաշտպանելու նպատակով: Դրանք են.
– 2011թ. հոկտեմբերի 18-ին ներկայացված օրինագիծն իր նախնական տեսքով, որը 45 հազար եվրոյի տուգանք եւ 1 տարվա ազատազրկում, կամ այդ երկու պատիժներից մեկն է նախատեսում բոլոր նրանց համար, ովքեր հրապարակավ կխրախուսեն, կվիճարկեն կամ կփորձեն արդարացնել ցեղասպանությունները, մարդկության դեմ հանցագործությունները եւ ռազմական հանցագործությունները:
– Օրենքով ճանաչված ցեղասպանությունների հերքումը քրեականացնող օրինագիծն այն տեսքով, որով 2012թ. հունվարի 23-ին ընդունվել էր եւ 2012-ի փետրվարի 28-ին ենթարկվել Սահմանադրական խորհրդի գրաքննությանը:
– Եվ, վերջապես, Մարսելի փաստաբանների կոլեգիայի անդամ պարոն Ֆիլիպ Գրիգորյանի օգնությամբ, Սահմանադրական խորհրդի վերոհիշյալ որոշման վրա լույս սփռելու նպատակով, Սահմանադրական խորհրդի հրապարակային դիրքորոշման պատճառները հետաքննող ժամանակավոր հանձնաժողով ստեղծելու բանաձեւ եմ ներկայացրել:
Այդ բոլոր երեք տեքստերն, իմ կարծիքով, այս գործի հաջող ելքի հույս են տալիս, որի նպատակը, ես ուզում եմ մեկ անգամ եւս հիշեցնել, պետք է արձագանք գտնի յուրաքանչյուր ֆրանսիացու սրտում` որպես  մարդու իրավունքների պաշտպանության կոչ: Այդ պատճառով էլ ես հանդիսավոր խնդրում եմ Ազգային ժողովի նախագահ Կլոդ Բարտոլոնին՝ կարճ ժամկետում Ազգային ժողովի օրակարգում ընդգրկել այդ երեք տեքստերը, որոնք ցանկացած տեսակի քաղաքական տարաձայնությունների, կուսակցական պատկանելության եւ մեծամասնության կամ ընդդիմության  ցանկացած դիրքորոշման սահմաններից դուրս են»:
Ամփոփելով Վալերի Բուայեն նշել է, որ 2001թ.  օրենքը որոշիչ էր մարդու իրավունքների պաշտպանության ճանապարհին: «Այս օրինագծերն ուղղված են քրեական օրենքների եւ 2001թ. օրենքի պաշտպանության համաձայնեցմանը: Ֆրանսիան չպետք է  կանգ առնի կես ճանապարհին»,– ընդգծել է ֆրանսիացի պատգամավորը:

http://www.resource.am/index.php?ln=1&pid=3479