Վաղը` դեկտեմբերի 15-ին, Թուրքիայում գործող հայկական հայրենակցական միությունները, առաջին անգամ մեկտեղվելով, Ստամբուլում կնշեն քրիստոնեական Սուրբ Հակոբ տոնը: Միջոցառմանը կմասնակցեն ադըյամանցի, ամասիացի, արաբկիրցի, դերսիմցի, տիգրանակերտցի (դիարբեքիրցի), խարբերդցի, համշենցի, պոլսեցի, քասթամոնուցի, կեսարացի, մալաթիացի, մուսալեռցի, սասունցի, սինոփցի, սեբաստացի, թոքաթցի և զարացի հայերը:
Միջոցառման կազմակերպիչների` Facebook սոցիալական ցանցում տարածած հաղորդագրության համաձայն` սույն երեկույթը սկզբնապես մտադրվել էր որպես նեղ կազմով հանդիպում, որին պետք է մասնակցեին Պոլսում գործող` համերկրացու հիմքով ստեղծված հայկական հայրենակցական միությունների ներկայացուցիչները միայն, սակայն հետագայում որոշվել է միջոցառումը բաց անցկացնել, որպեսզի դրան կարողանան մասնակցություն ցուցաբերել նման ցանկություն ունեցող բոլոր հայերը:
Ըստ հաղորդագրության` կազմակերպիչների նպատակն է` ցույց տալ, որ մարդիկ կարող են համատեղ նպատակներով մեկտեղվել և փաստացի պատասխան տալ որոշակի շրջանակներում շրջանառվող այն ենթադրություններին, թե հայերի կազմակերպման նպատակը «անջատողականությունն» է:
Կազմակերպիչները հաղորդագրության մեջ նաև հայտնում են, թե ինչու է միջոցառման օրն ընտրվել հենց Սուրբ Հակոբի օրը: Ըստ նրանց` գիտակցաբար տրված այդ նախապատվությամբ նպատակ ունեն հիշեցնել այն ավանդական տոներից մեկը, որը հնում նշվել է արևմտահայերի կողմից:
Հաղորդագրության մեջ տեղեկություններ են տրվում նաև առ այն, թե ինչ սկզբունքով են ընտրվել այն շրջանները, որոնց ներկայացուցիչ հայերը պետք է մասնակցեն այս միջոցառմանը: Կազմակերպիչների համաձայն` շրջանների անունների ընտրության ժամանակ գործել է հետևյալ սկզբունքը. տվյալ շրջանը կազմակերպվե՞լ է, կազմակերպման ընթացքի մե՞ջ է, տվյալ շրջանի հայերը որևէ օր կարողանու՞մ են մեկտեղվել:
Հաղորդագրության մեջ նշվում է, որ միջոցառումը բաց է անցկացվելու ոչ միայն հայերի, այլ նաև` իրեն հայերին մոտ համարող յուրաքանչյուր անձի համար:
Ըստ հաղորդագրության` երեկույթը կազմակերպվելու է ճաշկերույթի տեսքով, որի ժամանակ հնչելու է հայկական երաժշտություն: Որպես հյուր երգիչներ` մասնակցելու են պոլսեցի Պարթև Գարյանը և հայաստանցի Աշոտ Վարդանյանը:
Akunq.net
Leave a Reply