Կաղանդի կրկնեփներ

Ա.- Տուրմով սապլէ

Բաղադրութիւն

– 1 1/2 գաւած փոշի շաքար
– 2 գաւաթ կարագ
– 1 հաւկիթ
– Վանիլիա
– 3 1/2 գաւաթ ալիւր

Պատրաստութիւն

Բաղադրութիւնները խառնել` սկսելով շաքարով եւ հաւկիթով: Նախընտրելի է ելեկտրական գործիք չգործածել եւ ձեռքով շաղել զանազան նիւթերը:

Ստացուած խմորը երկուքի բաժնել եւ ալիւրոտուած սեղանի մը վրայ բանալ կէս սմ. թանձրութեամբ: Կլոր կաղապարով կտրտել բացուած խմորը, ապա ձեւաւորուած խմորները շարել ափսէի մը մէջ եւ միջակ ջերմութեամբ փուռի մէջ եփել:

Նոյնը կատարել խմորին երկրորդ կէսով, բայց` կլորներուն կեդրոնը երկրորդ կաղապարով մը աստղաձեւ բացուածքներ ձեւաւորելով:

Եփելէ ետք կլոր կրկնեփներուն վրայ շոքոմաքս քսել եւ վրան զետեղել աստղաձեւ բացուածքով երկրորդ կէսը:

Շոքոմաքսը կարելի է փոխարինել պեն մարիով հալած տուրմով եւ կամ ձեր նախասիրած մէկ անուշով:

Բ.- Կեռասով բլիթներ   

Բաղադրութիւն

– 2 գաւաթ կարագ
– 1 գաւաթ փոշի շաքար
– 1 թէյի դգալ կիտրոնի հիւթ
– 1 թէյի դգալ նարինջի հիւթ
– 1/2 թէյի դգալ աղ

Պատրաստութիւն

Միատեղ խառնել եւ շաղել բաղադրութիւնները, եթէ խմորը կակուղ է, ծածկել եւ սառնարանը ձգել:

Խմորէն ձեւաւորել 2-3 սմ. գնդակներ եւ շարել ափսէի մը մէջ, իրարմէ հեռու: Իւրաքանչիւրին կեդրոնը մատով ճնշել եւ փոսիկին մէջ շաքարոտած կեռասի մը կէսը տեղաւորել:

Փուռին մէջ եփել շուրջ 15 վայրկեան, սպասել, որ պաղի, ապա վրան փոշի շաքար ցանել:

Նոյն այս խմորով կարելի է պատրաստել մահիկաձեւ կրկնեփներ, ինչպէս նկարը ցոյց կու տայ:

Նշենք, որ այս 3 կրկնեփներն ալ կարելի է տօնածառի զարդարանքներու վերածել, եթէ անոնց վրայ ըմպեղէգով (շալիւմօ) ծակեր բանանք` նախքան փուռին մէջ եփելը: Եփելէ ետք այդ ծակերէն սիրուն ժապաւէններ անցուցէք եւ տօնածառին ճիւղերէն կախեցէք:

ՊատրաստեցՇՈՒՇԻԿՄԱՒԻՍԱԳԱԼԵԱՆ

http://www.aztagdaily.com/archives/98046