Դավութօղլու. «Թուրքիան շարունակելու է «զրո խնդիրներ հարևանների հետ» քաղաքականությունը»

Այս հայտարարությունը նոր անհանգստություն կարող է առաջացնել հարևանների մոտ:

Թուրքիայի արտգործնախարար Դավութօղլուն երեկ Մարոկկոյում հայտարարել է, որ Թուրքիան շարունակելու է «զրո խնդիրներ հարևանների հետ» քաղաքականությունը:

Սակայն այս հայտարարությունը կարող է նոր անհանգստություն առաջացնել հարևանների մոտ: Այն պահից, երբ Թուրքիան սկսեց իր «նոր» քաղաքականությունը հարևան երկրների նկատմամբ, ոչ միայն չի թուլացել լարվածությունը Իրանի, Սիրիայի, Կիպրոսի, Իրաքի, Հունաստանի, Հայաստանի և Վրաստանի հետ, այլ այն նոր զարգացումներ է ստացել:

«Զրո խնդիներ հարևանների» հետ քաղաքականության շրջանակներում Թուրքիան իր տարածքում տեղադրեց ՆԱՏՕ-ի ռադարները, որոնց 2013 թվականին կմիանան Պետրիոտ հրթիռային համակարգերը: Սա բացահայտ թշնամական վերաբերմունք էր Սիրիայի, Իրանի և Իրաքի նկատմամբ:

Սիրիայի նախագահ Բաշար ալ Ասադի հետ «ջերմ, բարեկամական» հարաբերություններ հաստատելուց հետո Թուրքիան կարողացավ ներթափանցել Սիրիա, որի արդյունքում մինչ օրս շարունակվում է քաղաքացիական պատերազմը:

Թուրքիա-Իրան հարաբերությունների պատմության մեջ առաջին անգամ Թուրքիայի նախագահը պաշտոնական այց կատարեց նաև Թավրիզ, որի արդյունքում Ատրպատակարանում միանգամից աճեցին անջատողական տրամադրությունները:

Իրաքի կենտրոնական իշխանությունը ներկայում մեղադրում է Թուրքիային սուննի ահաբեկչական խմբավորումներին աջակցելու և ահաբեկչության կազմակերպիչներին քաղաքական ապաստան տալու մեջ: Վրաստանի հետ հարաբերությունները սերտացնելով` Թուրքիան հնարավորություն ունեցավ ներթափանցել Աջարիա և մեծացնել իր տնտեսական ու քաղաքական ազդեցությունն այդ տարածաշրջանում:

Այժմ Վրաստանի թիվ 2 ազգային անվտանգության խնդիրը (թիվ 1-ը Աբխազիան և Հարավային Օսեթիան են) Աջարիայի բնակչություն իսլամացումն է, որն իրականացվում է Թուրքիայի կողմից բացահայտ ֆինանսավորմամբ:

Հայաստանի հետ Թուրքիան ստորագրեց հայ-թուրքական արձանագրությունները, որոնց արդյունքում ներկայում Թուրքիա-Հայստան հարաբերություններն ավելի են վատթարացել, քան դրանք կային մինչև արձանագրությունների ստորագրումը: Բավականին բարդ ու լարված հարաբերություններ են Հունաստանի և Կիպրոսի հետ:

Դավութօղլու այս վերջին հայտարարությունը վկայում է, որ Թուրքիայի հարևանները կարող են նոր թշնամական բնույթի անակնկալներ սպասել, քանի որ դրանք միշտ էլ «զրո խնդիրներ» են կոչվել:

http://www.armweeklynews.am/awn/mn12/mn_1262.htm