Մերձավոր Արևելքում ապագայում կստեղծվի Քրդստան պետությունը

«Թուրքիան անհանգստացած է Սիրիայում քրդական գործոնի ակտիվացմամբ: Եթե մինչ այդ նրանք ունեին իրենց սահմանին` Հյուսիսային Իրաքում քրդական ինքավարությունը, որը կամաց-կամաց գնում էր դեպի լրիվ անկախություն, հիմա թուրքերն իրենց անխոհեմ և ավանտյուրիստական քաղաքականության պատճառով ստացան նոր ձևավորվող քրդական ինքնավարություն` Սիրիայի հետ սահմանին»,- Aysor.am-ի հետ զրույցում անդրադառնալով Սիրիայի հյուսիսում քրդական ինքավարության ձևավորման և Մերձավոր Արևելքում քրդական գործոնին՝ ասաց Արևելագիտության ինստիտուտի տնօրեն, թուրքագետ Ռուբեն Սաֆրաստյանը:

Նա նշեց, որ Թուրքիայի սահմանի մի մեծ հատվածը` Սիրիայի և Իրաքի տարածքում, զբաղեցնում են քրդական ինքնավարությունները, և դա դրական խթան է Թուրքիայի քրդերի համար՝ ակտիվացնելու պայքարն իրենց իրավունքների համար:

«Մերձավոր Արևելքը աստիճանաբար գնում է դեպի Քրդստան պետության ձևավորում, առաջացում»,- նշեց Սաֆրաստյանը:

Բանախոսի խոսքով՝ այժմ շատ դժվար է կանխատեսել,  թե ինչ սահմաններ կունենա ապագա Քրդստան պետությունը, բայց կարելի է շատ հստակ ասել, որ Մերձավոր Արևելքի այնպիսի մեծ ժողովուրդ, ինչպիսին քրդերն են, չեն կարող երկար ժամանակ չունենալ իրենց պետականությունը:

Սաֆրաստյանի խոսքով՝ Քրդստանի ստեղծման նախանշանները երևում են Իրաքում և Սիրիայում, իսկ Թուրքիայում  ուժեղանում է քուրդ ժողովրդի պայքարը իր իրավունքների համար:
 
Ռ. Սաֆրաստյանը հավելեց, որ Քրդստանի ստեղծման գործընթացը գնում է առաջ, և պետք է սպասել ապագա զարգացումներին:

http://www.aysor.am/am/news/2012/12/11/kurd-syria-safrastyan/