Պոլսո պատրիարքարանի մատուցմամբ` Հռոմի պապն էլ է քաջալերում Թուրքիայի նախագահի ապագա թեկնածուին

Այժմ էլ Հռոմի պապն է պարգևատրել Ստամբուլի Շիշլիի քաղաքապետին` հայերին և եկեղեցուն մատուցած ծառայությունների համար:

Նոր տեղեկություններ են ստացվում Ստամբուլից` կապված Ստամբուլի Շիշլիի քաղաքապետ Մուսթաֆա Սարըգյուլի` սահմանադրական փոփոխություններից հետո Թուրքիայի նախագահի թեկնածու լինելու հավանականության մասին:

Armweeklynews.am-ը երկու անգամ անդրադարձել էր այս թեմային: Առաջին անգամ մեր կայքը հավանական էր համարում, որ Սարըգյուլը, լինելով ընդդիմության ամենահեղինակավոր քաղաքական գործիչը, հնարավոր է` ապագայում առաջադրի իր թեկնածությունը Թուրքիայի նախագահ ընտրվելու համար: Երկրորդ անգամ անդրադարձն այն մասին էր, որ Մուսթաֆա Սարըգյուլն ինքն է խոստովանել, որ ձգտում է Թուրքիայի նախագահ դառնալ:

Այժմ մեր գործընկերները Ստամբուլից տեղեկացնում են, որ նոյեմբեր ամսի երկրորդ կեսին Շիշլիի քաղաքապետ Մուսթաֆա Սարըգյուլը առանձնազրույց է ունեցել Պոլսո պատրիարքի փոխանորդ Աթեշյանի հետ, երբ նրանք այցելել են Ստամբուլի Զինջիրլիքույու գերեզմանատուն, ուր 2011թ. դեկտեմբերին հուղարկավորվել էր Մուսթաֆա Սարըգյուլի հայրը` Հաքքը Սարըգյուլը:

Ըստ տեղեկությունների` Սարըգյուլն իր բարեկամների հետ այցելել է հոր գերեզման` 2013թ. հունվարին նրա մահվան երկրորդ տարելիցի կապակցությամբ հիշատակի միջոցառումների և արարողությունների կազմակերպման նպատակով:

Ականատեսների վկայությամբ` Զինջիրլիքույու գերեզմանատանը Պոլսո պատրիարքի փոխանորդ Արամ Աթեշյանը և Մուսթաֆա Մարըգյուլն առանձնացել են ու շուրջ 20 րոպե առանձնազրույց ունեցել` քայլելով գերեզմանատան տարածքում:

Եվ ահա 2012թ. դեկտեմբերի 8-ին Վատիկանի մամլո ծառայությունը տեղեկացնում է, որ Հռոմի պապ Բենեդիկտոս 16-րդը Ստամբուլի Շիշլիի քաղաքապետ Մուսթաֆա Սարընգյուլին պարգևատրել է կաթոլիկ եկեղեցու ամենաբարձր շքանշանով` հայերին և եկեղեցուն մատուցած ծառայությունների համար:

http://www.armweeklynews.am/awn/mn12/mn_1240.htm