Դինքին դատապարտած Թուրքիայի նորընտիր օմբուդսմենն իրեն արդարացնելու նոր հնարքներ է գտել

Թուրքիայի մարդու իրավունքների նորընտիր պաշտպան Նիհաթ Օմերօղլուն Ստամբուլի «Ակօս» թերթի հայազգի խմբագրապետ Հրանտ Դինքին քրեական օրենսգրքի 301-րդ հոդվածով դատապարտելու համար իր հասցեին հնչող քննադատություններին պատասխանել է, թե «համառորեն չի պնդում, թե որոշումը ճիշտ է, բայց այն ժամանակ օրենքն այդպես էր»:

Ինչպես հաղորդում է «Արմենպրես»–ը, HaberTürk-ին տված հարցազրույցում Ստամբուլի վճռաբեկ դատարանի նախկին անդամը, ով եղել է Դինքի դատավաճռին կողմ քվեարկած 18 դատավորներից մեկը, հայտարարել է, որ Թուրքիայի վարչապետ Թայիփ Էրդողանի` իր որդու հարսանիքի քավորը լինելու հանգամանքն ընդունված որոշման հարցում «դերակատարություն չի ունեցել»: «Ցավում եմ, որ խորհրդարանում իմ երդմնակալության ժամանակ ընդդիմադիր Ժողովրդահանրապետական կուսակցության պատգամավորական խմբակցությունը մեջքով շրջվել եւ բողոք է հայտնել` հարվածելով սեղաններին: Դինքի նկատմամբ դատավճիռն ընդունվել է 2006 թ., իսկ օրենքը փոխվել է 2008 թ.: Մենք որոշումն ընդունել ենք այն ժամանակ գործող օրենքին համապատասխան: Ես համառորեն չեմ պնդում, թե որոշումը ճիշտ էր, բայց օրենքն այդպիսին էր: Այժմ ինձ դատապարտում են առանց դատի», – դժգոհել է նա:

Մարդու իրավունքների եվրոպական դատարանը բավարարել է Հրանտ Դինքի փաստաբանների` այդ վճռի նկատմամբ բողոքը եւ Թուրքիայի կառավարությանը պարտադրել փոխհատուցում կատարել նրա ընտանիքին, ինչը մինչ այժմ չի արվել: «Թրքությունը վիրավորելու» հոդվածով դատապարտումից ոգեւորված թուրքական ազգայնական շրջանակները 2007 թ. հունվարի 19-ին Հրանտ Դինքին սպանել են «Ակօս»-ի խմբագրատան առջեւ:

http://armenpress.am/arm/news/702028/dinqin-datapartats-turqiayi-noryntir-ombudsmenn-iren.html