Թուրքիայի նախագահի թեկնածուներից մեկը նաև հայ համայնքի շահերը կներկայացնի

Թուրքիայի ամենահեղինակավոր քաղաքական գործիչները սպասում են սահմանադրական փոփոխություններին

Թուրքիայի Մեծ մեջլիսի նոր սահմանադրության նախագծի մշակման հանձնաժողովում շարունակվում են աշխատանքները, սակայն այս պահին հստակ է մի բան. Թուրքիան կդառնա նախագահական հանրապետություն և նախագահը կընտրվի ժողովրդի կողմից` ուղիղ ընտրությամբ:

Այսօր իսկ ապագա նախագահական ընտրություների նկատմամբ հավակնություն ունի ոչ միայն իշխող կուսակցության ղեկավար, գործող վարչապետ Թայիպ Էրդողանը, այլ նաև հիմնական ընդդիմադիր ուժերի հեղինակություն վայելող քաղաքական գործիչները:

Թուրքիայի Հանրապետական ժողովրդական կուսակցության (CHP) ամենահեղինակավոր գործիչներից մեկը` Ստամբուլի Շիշլիի քաղաքապետ Մուսթաֆա Սարըգյուլը խոստովանել է, որ նպատակ ունի իր թեկնածությունն առաջադրել Թուրքիայի նախագահական ընտրություններում` սահմանադրական փոփոխություններից հետո: Երկու շաբաթ առաջ հյուրընկալվելով Թուրքիայի գործարար կանանց միության համաժողովին` Սարըգյուլը պատասխանել է նաև իր հետագա քաղաքական կարիերային վերաբերող հարցերին:

Այն հարցին, թե արդյոք նա պատրաստվում է իր թեկնածությունն առաջադրել Ստամբուլի քաղաքապետի պաշտոնի համար, Սարըգյուլը պատասխանել է. «Ստամբուլի քաղաքապետի թեկնածու որոնլիս ես չկամ, որովհետև անպայման կհաղթեմ»:

Այնուհետ` սուրճի սեղանի շուրջ քննարկումների ժամանակ, Սարըգյուլը հաստատել է, որ եթե մտնի էլ ակտիվ քաղաքականության մեջ, ապա միայն Թուրքիայի նախագահ դառնալու համար: Հիշեցնենք, որ 2012թ. հուլիսի 17-ին CHP կուսակցության նախագահի հիմնական թեկնածու համարվում էր Մուսթաֆա Սարըգյուլը, ով, սակայն, հրաժարվեց առաջադրումից` հայատարելով, որ կուսակցության առաջնորդ կլինի միայն մի պայմանով, եթե CHP-ն հստակ նպատակադրվի գալ իշխանության երկրում և հաղթել AKP-ին:

Ով է Մուսթաֆա Սարըգյուլը:

Թուրքիայում քաղաքական ոլորտում ամենամեծ ներուժ ունեցող երիտասարդ քաղաքական գործիչներից մեկը Մուստաֆա Սարըգյուլն է և նա միաժամանակ համարվում է Թուրքիայում հայկական կազմակերպությունների և հայ եկեղեցու պաշտպան ու աջակից սյուներից մեկը: Սարըգյուլը այն գործիչներից է, ում քաղաքական կենսագրությունը “մաքուր է” և ինչպես թուրքական թերթերն են գրում, այդ գործչի հեղինակությունն ընդունելի է Թուրքիայի աջ և ձախ ուղղությունները ներկայացնող քաղաքական հոսանքների կողմից: Սարըգյուլին դրական են վերաբերվում նաև քրդական քաղաքական գործիչները:

Ստամբուլի Շիշլի քաղաքապետ Մուստաֆա Սարըգյուլը առաջին քաղաքական գործիչն էր, որ 2009թ. համարձակվեց հայ համայնքին ողջունել հայերեն, ինչը զարմանք առաջացրեց ողջ Թուրքիայում: Պատահական չէ, որ Պոլսո Հայոց պատրիարքարանը 550-ամյակի տոնակատարությունների շրջանակներում հայկական եկեղեցիները վերականգնելու համար Հովհաննես Կոլոտ պատրիարքի անվան հատուկ շքանշան է հանձնել Շիշլիի քաղաքապետ Մուստաֆա Սարըգյուլին 2011թ. մայիսին:

 Մուստաֆա Սարըգյուլը դարձավ առաջին մահմեդականը, ով պարգևատրվել է այդ շքանշանով:

http://www.armweeklynews.am/awn/mn12/mn_1237.htm