Թուրքական կեղծիքները մինչև ու՞ր են հասնելու

Թուրքական «Haber 7» կայքում տեղ է գտել դոկտոր, պրոֆեսոր Աթա Աթունի «Հայկական ստերը մինչև ու՞ր են գնալու» վերնագրով հոդվածը, որը վերջինս հրապարակել է նաև իր անձնական կայքում: Ահա, թե ինչ է գրում Հայոց ցեղասպանությունը ժխտող թուրքական պաշտոնական թեզի ևս մեկ ջատագովը.

«Հայկական պնդումների վերաբերյալ օտար աղբյուրներ, գրքեր, փաստաթղթեր, ուսումնասիրություններ կարդալով` սկսեցի ավելի լավ հասկանալ, թե դրանք ինչպիսի հորինվածք են: Պարզ է, որ Ամերիկայում շահառու մի խումբ կա, որը իր գոյությունը պահպանում է հայկական արմատներ ունեցող ամերիկացիների և եվրոպացիներից ստացած փողերով: Որպեսզի ճշմարտությունը ի հայտ չգա, նրանք չեն ցանկանում, որ հայ և թուրք պատմաբանները միասին նստեն և հարցը քննարկեն»:

Այնուհետև հեղինակը սկսում է խոսել Շյուքրու Սերվեր Այայի հեղինակած և տարվա սկզբին լույս ընծայվելիք  գրքի մասին, որտեղ  անհեթեթ բաներ են խոսվում, թե իբր Հայոց ցեղասպանության վերաբերյալ Մորգենթաունի հուշերը իրականում նա չի գրել, այլ երկու հայ պարոնների. Արշակ Շմավոնյանի և Հակոբ Անտոնյանի պատմածների հիման վրա Բուրթոն Հենդրիչն է գրել, որի համար շատ մեծ գումար է ստացել:

Վերջում Աթա Աթունը բոլորին կոչ է անում լույս տեսնելուն պես կարդալ այդ գիրքը` հավատացնելով, թե «Շյուքրու եղբոր նման մասնագետների գրքերի և հոդվածների շնորհիվ աշխարհը մի օր կհասկանա ճշմարտությունը»:

Ահա և պատմական իրականության խեղաթյուրման ևս մեկ փորձ: Մենք կարող ենք միայն զարմանալ այս անբարո արարքների վրա և հեղինակ Աթա Աթունին ի պատասխան ասել`«Թուրքական կեղծիքները մինչև ու՞ր են հասնելու»:

http://ankakh.com/2012/12/265749/