Արա Պապյան. Հայաստանը պետք է հետ կանչի իր ստորագրությունները հայ-թուրքական արձանագրություններից

Հայ ժողովուրդը եւ պետությունը ներկայում գտնվում են լուրջ մարտահրավերների առջեւ: Այս պահին ամենագլխավորը ոչ հեռու անցյալի սխալներն ուղղելն է, որոնցից ամենամեծը 2009 թ. հոկտեմբերի 10-ին Ցյուրիխում հայ-թուրքական արձանագրությունների ստորագրումն է: Այս մասին հայտարարել է «Մոդուս Վիվենդի» սոցիալական հետազոտությունների կենտրոնի ղեկավար, Կանադայում հայաստանի նախկին դեսպան Արա Պապյանը` Երեւանում կայացած «Միասնական օրակարգ նախագահական ընտրությունների համար» ֆորումում:

Նրա խոսքով, հայ-թուրքական արձանագրությունների ստորագրումից հետո 3 տարիների ընթացքում ակնհայտ դարձավ, որ դրանք ամբողջովին ձախողվել են: Արձանագրություններում դրված երկու նպատակները՝ դիվանագիտական հարաբերությունների հաստատումը եւ սահմանների բացումը, չեն իրագործվել:

Ընդ որում, Արա Պապյանը սահմանները համարում է «այսպես կոչված», քանի որ «դա նախկին ԽՍՀՄ սահմանն է, ոչ թե՝ հայ-թուրքական. դրանք լրիվ տարբեր բաներ են»:

Նախկին դիվանագետի խոսքով, արձանագրությունները օրինականացնում են Հայաստանի հողային իրավունքների խախտումները: Անհրաժեշտ է հետ կանչել ստորագրությունները եւ նոր քաղաքականություն սկսել Թուրքիայի նկատմամբ, կարծում է Արա Պապյանը:

Լուսանկարն՝ Արսեն Սարգսյանի

http://news.am/arm/news/131436.html