Թուրքիայի նախագահին սպանել են նրա շրջապատի մարդիկ` արտաքին ուժերի դրդմամբ. թուրք կուսակցապետ

Թուրքիայի նախկին նախագահ Թուրգութ Օզալի թունավորման վերաբերյալ նոր վարկածներ են ի հայտ գալիս:

Օզալի հիմնադրած Մայր հայրենիք կուսակցության ներկայիս նախագահ Իբրահիմ Չելեբին հայտարարել է, որ նախագահի սպանությունն իրականացրել են նրա աշխատակիցներն` արտաքին ուժերի մասնակցությամբ:

Նշենք, որ 1989 թվականից Թուրքիայի նախագահի պաշտոնը զբաղեցրած Օզալը մահացել էր 1993 թ.` խիստ կասկածելի հանգամանքներում:

Շաբաթներ առաջ թուրքական իշխանությունները որոշել էին բացել նրա գերեզմանը` նոր դատական փորձաքննություն անցկացնելու նպատակով: Տարբեր աղբյուրներ նշում էին, որ Օզալի մնացորդներում 4 տարբեր թույներ են հայտնաբերվել, ինչն էլ ենթադրում է, որ նրան սպանել էին:

Օրերս Չելեբին հանդես է եկել ուշագրավ հայտարարությամբ, որով նշում է, թե Օզալին թունավորելով սպանել են արտասահմանյան ուժերը` չհստակեցնելով, թե ինչ ուժերի մասին է խոսքը: Թուրք կուսակցապետը նաև հավելել է, որ իրենք ենթադրում են` նախագահի սպանությանը մասնակցել են նաև նրա այն ժամանակվա աշխատակիցները` ուղղորդվելով արտաքին և ներքին ուժերի կողմից:

http://haynews.am/hy/1354731002