Ստամբուլի «Ակօս» շաբաթաթերթի նախկին խմբագրապետ Հրանտ Դինքի սպանության գործով վերջերս դատախազ նշանակված Հիքմեթ Ուսթանն արդեն պաշտոնանկ է արվել: Ուսթանը կարծում էր, որ Դինքի սպանության հետեւում կազմակերպություն կա կանգնած եւ վճռական էր այդ խնդիրը լուծելու հարցում: Ինչպես փոխանցում է «Արմենպրես»-ը` Asbarez-ն այս առնչությամբ մեջբերել է «Մարմարա»-ի հրապարակումը, որտեղ նշվում է. «Հրանտ Դինքի սպանության դատավարության առնչությամբ հոդվածներն ամեն օր ողողում են թուրքական մամուլը: Կարծես թե մի բան կա, որը շարունակ արգելք է հանդիսանում այս սպանության գաղտնիքների բացահայտման համար: Գիտենք, թե ով սպանեց Հրանտ Դինքին, սակայն չգիտենք, թե ով պատվիրեց սպանությունը: Գիտենք նաեւ, որ կա անպայման մեկը, ով նրան սպանելու հրաման է տվել»:
Երբ դատավարության ընթացքում դատավորը շեշտել է, որ սպանության հետեւում կազմակերպություն չկա, Հիքմեթ Ուսթան պատասխանել էր. «Կազմակերպություն էլ կար, փաստեր էլ կան»: Ուսթան նաեւ այլ համոզմունքներ էլ ունի այս հարցի առնչությամբ: Նա հավատացած էր, որ Տրապիզոնի «Զիրվէ» հրատարակչատան ղեկավարների դեմ իրականացված սպանդը կապ ունի Դինքի սպանության հետ, ուստի «Զիրվէ»-ի սպանության գործն իբրեւ փաստ ցանկացել է օգտագործել Դինքի սպանության գործում: Այս ուսումնասիրություններում Հիքմեթ Ուսթան նոր էր սկսել հետազոտություններ իրականացնել, երբ դեկտեմբերի 2-ին անակնկալ կերպով հաղորդվել է, որ Թուրքիայի Դատախազների եւ դատավորների բարձրագույն խորհրդի որոշմամբ` Ուսթան հեռացվել է այդ գործից եւ նշանակվել է Բաքըրգիղի դատախազ: Այս նշանակումը շատերի համար բնական չէր: «Զիրվէ»-ի սպանության դատավարության փաստաբաններից Էրդալ Դողան լուրջ կասկածներ է հայտնել այս առնչությամբ եւ հիշեցրել, որ այս դեպքից առաջ էլ նման կերպով՝ պաշտոնի բարձրացման պատրվակով մեկ այլ տեղ դատախազ էին նշանակել Զեքերիա Էոզին:
Leave a Reply