Թուրքիայի 2013թ. ռազմական բյուջեն 11,2 մլրդ ԱՄՆ դոլար է կազմելու, ինչը 11,8%-ով ավել է ընթացիկ տարվա բյուջեից, հաղորդում է lenta.ru-ն` հղում կատարելով Jane’s պարբերականին:
Մոտ 20%-ով ավելանում է թուրքական Անվտանգության գլխավոր վարչության բյուջեն: Զգալի կավելանան նաև ափային գոտու պաշտպանության ծախսերը և երկրի հետախուզական բյուջեն:
Բացի այդ` նախատեսվում է ավելացնել ժանդարմական ծառայության, ոստիկանության և այլ ուժային կառույցների բյուջեները: Ուժային բլոկի ընդհանուր բյուջեն կաճի 16,3 %-ով` հասնելով 25,1 մլրդ ԱՄՆ դոլարի:
Թուրքիայի ռազմական և ընդհանուր ուժային բյուջեների նման կտրուկ աճի հիմնական գործոն Jane’s-ը անվանում է Քրդական աշխատավորական կուսակցությանը հակազդելը, որը շարունակվում է արդեն 28 տարի, ինչպես նաև` վերջին շրջանում լրջորեն սրված թուրք-սիրիական հարաբերությունները:
Leave a Reply