Հույն պաշտոնաթող գեներալ Ֆրանգուլիս Ֆրանգոսը գիրք է գրել՝ պնդելով, որ Թուրքիայի պատմության առաջնորդներից Ֆաթիհ Սուլթան Մեհմեդը, Աթաթուրքը, Ռեջեփ Թայիփ Էրդողանը և փոխվարչապետ Բյուլենթ Առընչը թուրք չեն։
Ինչպես տեղեկացնում է «Հուրրիյեթը», Ֆրանգոսը «Որ Թուրքիան և որ թուրքերը» անվանմամբ գրքի նախաբանում գրել է. «Գրքիս շապիկին Ֆաթիհի, Մուսթաֆա Քեմալի և Էրդողանի նկարներն են, քանի որ նրանք երեքն էլ թուրք չեն»։
Հույն գործիչը պնդում է, որ Օսմանյան սուլթաններից Ֆաթիհը հույն է, քանի որ թաղվել է բյուզանդական եկեղեցում։ «Մահվանից 6 ամիս առաջ թույլ տվեց նկարել իրեն։ Այդ դիմանկարի հետևում նույնպես հունարեն է գրված»,-բացատրում է Ֆրանգուլիսը։
Անդրադառնալով Մուսթաֆա Քեմալ Աթաթուրքին, Ֆրանգոսը պնդում է, որ նա ծնվել է ոչ թե Սալոնիկում, այլ Մալաթիայում, իսկ նրա մայրը համարվող Զուբեյդեն իրականում մորաքույրն է։
Հիշեցնենք, որ թուրքական մամուլում անցնող ամիսների ընթացքում ևս պնդումներ էին եղել, թե իրականում Մուսթաֆա Քեմալը ծնվել է Մալաթիայում, և պնդում կար, որ հիմնականում քրդաբնակ և հայաբնակ Մալաթիայում ծնված Քեմալը կամ քուրդ է, կամ հայ։
Ֆրանգուլիսի պնդմամբ՝ Թուրքիայի գործող վարչապետ Ռեջեփ Թայիփ Էրդողանի պապերը նույնպես հույն են և հունական զինյալ խմբերի հետ կռվել են թուրքերի դեմ։
Նախկին գեներալի համոզմամբ՝ Թուրքիայի բնակչության միայն 40%-ն են կազմում թուրքերը, և նրանք մտադիր են վերականգնել Օսմանյան կայսրությունը։
Leave a Reply