Հարևանների հետ թշնամական հարաբերությունների պատճառով Թուրքիան չի կարող անդամակցել ԵՄ-ին. արևելագետ

ՀՀ գիտությունների ազգային ակադեմիայի Արևելագիտության ինստիտուտի գիտաշխատող Վահրամ Տեր-Մաթևոսյանն այսօր լրագրողների հետ հանդիպմանն ասաց, որ Թուրքիայի նման երկիր, որը թշնամական քաղաքականություն է վարում իր հարևան երեք պետության նկատմամբ, չի կարող անդամակցել ԵՄ-ին։ 

Նրա խոսքով՝ եթե 2005թ. ԵՄ անդամ պետությունների գրեթե 80%-ը համաձայն էր Թուրքիայի անդամակցությանը ԵՄ-ին, ապա այսօր այդ երկրների թիվը նվազել է և կազմում է 45 %:

«Անկումը առաջին հերթին կապված է Թուրքիայի ներքին խնդիրների հետ: Թուրքիան կամաց-կամաց վերածվում է ազգայնական հասարակության: Ցավագին է ընդունում, երբ որևէ երկրի կողմից քննադատություն է հնչում, այն դառնում է ազգային արժանապատվությանը հարված: Բայց ամեն ինչ կախված է Թուրքիայի հետագա պահվածքից»,- ասաց նա։

Վահրամ Տեր-Մաթևոսյանն անդրադարձավ նաև հոկտեմբերի 10-ին Եվրոպական Միության հրապարակած տարեկան զեկույցին: Նա նշեց, որ Հայաստանի համար հետընթաց է այն, որ եթե 2000-2009 թթ-ի զեկույցում նշվում էր «Հայաստան-Թուրքիա» ձևակերպումը, ապա 2010-ից հետո փոխվեց ձևակերպումը և ընդամենը նշված է, որ՝ «հայ-թուրքական հարաբերություններում առաջընթաց չկա»:

«Պետք է վերադարձնել նախկին ձևակերպումը և նշել, որ Թուրքիան է փակել սահմանը: Պետք է հաջորդ տարվա զեկույցում սկսի նշվել, որ Ցեղասպանության ճանաչման ուղղությամբ Թուրքիան վարում է նույն քաղաքականությունը, միջոցներ չի ձեռնարկում իր տարածքում հայկական մշակույթի պահպանման ուղղությամբ»,- ասաց նա:

Վահրամ Տեր-Մաթևոսյանը նաև նշեց, որ ԵՄ-ի զեկույցի կարևորագույն առանձնահատկություններից մեկն այն է, որ դրանում առաջին անգամ նշվում է կրիպտո հայերի՝ Թուրքիայում ապրող ծպտյալ հայերի մասին:

«Եվրոպական հանձնաժողովը շատ լավ պատկերացնում է, թե իրականում Թուրքիայում ինչ է տեղի ունենում: Սեպտեմբերի 30-ին Թուրքիայի իշխող կուսակցության համագումարը տեղի ունեցավ: Այն ուրվագծեց, որ հաջորդ վարչապետը Մեհմեդ Ալի Շահինն է լինելու, ով (Ռեջեփ Թայիփ) Էրդողանի հավատարիմ գաղափարակիցն է համարվում»,- ասաց նա:

http://tert.am/am/news/2012/10/26/vahram-ter-matevosyan/