Համշենահայերի այս գյուղում պատմաբաններից լավ գիտեն, թե երբ են իսլամ ընդունել

Միշտ չէ, որ պատմագիտությունը համընկնում է իրականության հետ

Թուրքական Ջիհան գործակալությունը տեղեկություն է տարածել Արդվինի մարզի համշենահայ Յանըքլը գյուղի Կուրբան Բայրամ կրոնական տոնակատարության ավանդույթի մասին: Դիպվածի արդյունքում պարզվել է, թե այս գյուղի բնակիչները երբ են իսլամ ընդունել և կրոնափոխ եղել: Գյուղի իմամ Նահիտ Ալթունը պատմել է, որ արդեն 150 տարի է` գյուղը նույն կերպ է տոնում կրոնական տոնը:

Գյուղի այն ընտանիքները, ովքեր պետք է կենդանի մորթեին, մատաղացու կենդանիների միսը հավաքում են մեկ տեղ, այնուհետ այն հավասարապես բաժանվում է գյուղի բոլոր բնակիչներին` ըստ շնչի: Մսացուն տրվում է նաև այն ընտանիքներին, ովքեր հնարվորություն չունեն կենդանի մորթել, ինչպես նաև նրանց, ովքեր այդ պահին գյուղում հյուր են:

Սակայն թուրքական Ջիհան գործակալությունը միտումնավոր կրճատել է իմամի խոսքերը, որն ամբողջովին եթեր է տվել Արդվինի JusufelimTV հեռուստաընկերությունը:

Իմամ Նահիտ Ալթունն ասել է, որ 150 տարի է` մատաղացու մսի բաժանման այս ավանդույթը կա, այն օրից, երբ առաջին անգամ գյուղի բնակիչները Կուրբան Բայրամ են սկսել տոնել, թեև գյուղի մեծերն ասում են, որ այդ ավանդույթն ավելի հին արմատներ ունի:

Ջիհան գործակալությունը «մոռացել» է տեղեկատվության մեջ հիշատակել իմամի «երբ առաջին անգամ գյուղի բնակիչները Կուրբան Բայրամ են սկսել տոնել, թեև գյուղի մեծերն ասում են, որ այդ ավանդույթն ավելի հին արմատներ ունի» խոսքերը: