Ֆրանսիայի Ազգային ժողովի սոցիալիստների կուսակցության նախագահ Բրյունո Լե Ռուն Ֆրանսիայում Հայկական կազմակերպությունների համակարգող խորհրդի (CCAF) պատվիրակության համանախագահների հետ հանդիպմանը վերահաստատել է կուսակցության` Հայոց ցեղասպանության ժխտումը քրեականացնող օրինագծի ընդունման մտադրությունը: «Արմենպրես»-ի հետ զրույցում այս մասին ասաց Հայկական կազմակերպությունների համակարգող խորհրդի համանախագահ Արա Թորանյանը: «Լե Ռուի կուսակցությունն էր, որ վեց տարի առաջ այս օրինագիծը ներկայացրել է Խորհրդարանին, նույն կուսակցությունն է, որ երկու տարի առաջ Սենատի առջեւ առաջարկեց նույն օրինագիծը, հետեւաբար` սպասում ենք, որ այն կշարունակի իր բռնած ուղին»,- ասաց Թորանյանը:
Խորհրդի համանախագահի խոսքով` Լե Ռուն նշել է, որ ոչինչ չի փոխվել, պարզապես իրենք դեռ կարճ ժամանակ է, ինչ իշխանության են եկել, պետք է սպասել` վստահեցնելով, որ իրենց սկզբունքներում որեւէ բան չի փոխվել: Ֆրանսիայի նախագահ Ֆրանսուա Օլանդը պետք է հարգի իր տված խոստումը, եւ Հայոց ցեղասպանության ժխտումը քրեականացնող նոր օրենքի նախագիծ իրենք պետք է առաջարկեն ապրիլի 24-ին ընդառաջ: Հայաստանի եւ Ֆրանսիայի նախագահներ Սերժ Սարգսյանի եւ Ֆրանսուա Օլանդի` նոյեմբերի 12-ին կայանալիք հանդիպումը, Թորանյանի խոսքով, առիթ կդառնա, որ այս ամենն ավելի պաշտոնական հիմքերի վրա դրվի:
Փարիզի Հայ դատի գրասենյակի ղեկավար Հրաչ Վարժապետյանն «Արմենպրես»-ի հետ զրույցում նշեց, որ երկու երկրների նախագահների հանդիպման նախապատրաստական աշխատանքներն արդեն ընթացքի մեջ են, Ելիսեյան պալատի հետ արդեն կապ է հաստատվել, դեսպանատունն էլ աշխատանքներ է կատարում այդ ուղղությամբ: Ֆրանսահայ համայնքը, իր հերթին, ամեն ինչ անում է նախագահին հավուր պատշաճի ընդունելու համար: Հայ համայնքի եւ Օլանդի` նախատեսված հանդիպմանն անդրադառնալով` Վարժապետյանը նշեց, որ դեռ ճշտված չեն ժամկետները. հանդիպումը ձգձգվում է, այդ իսկ պատճառով դեռեւս ոչինչ չի հայտարարում:
http://armenpress.am/arm/news/697117/fransiayum-hayoc-cexaspanutyan-zhkhtumy-qreakanacnox.htmlա
Leave a Reply