Հակահայկական, հակահրեական եւ հակաքրիստոնեական գրքեր` Թուրքիայի դպրոցներում

Գեւորգ Ստամբոլցյան

Հայերին նվիրված հատորը վերնագրված է` «Ես ջնջում եմ այս էջը. Հայկական հարց»։

«Հակահայկական, հակասեմական եւ հակաքրիստոնեական»` այսպես են բնութագրում թուրք իրավապաշտպաններն ու կրթական համակարգի մասնագետները օրերս Ստամբուլի մի շարք դպրոցներ առաքված գրքերը, որոնք, հեղինակների պնդմամբ, պետք է թուրք դպրոցականներին «անկաշկանդ» ոճով ներկայացնեին աշխարհի ամենահայտնի մարդկանց կենսագրություններն  ու երկրի պատմության առանցքային իրադարձությունները: Այս մասին գրում է France Press գործակալությունը:

«Մեծ Քայլեր կենսագրական շարք» կոչվող 15-հատորանոց այս ժողովածուում, գործակալության վկայությամբ, բազմաթիվ վիրավորական, ատելություն սերմանող եւ ծաղրական արտահայտություններ են տեղ գտել, որոնց մի մասի հասցեատերը հայերն են:

Նշենք, օրինակ, որ այս ժողովածուի` հայերին նվիրված հատորը վերնագրված է շատ պարզ ու հստակ` «Ես ջնջում եմ այս էջը. Հայկական հարց»: Գրքի հեղինակները Ցեղասպանության մասին պնդումները որակել են որպես «կատարյալ սուտ», իսկ այն թուրքերին, որոնք համակրանքով են վերաբերվում հայերին, բնութագրում են այսպես` «չարիք, որ բուն է դրել մեր կողքին»: Ի դեպ` հայերին նվիրված այս հատորը իրավապաշտպանների պահանջով արդեն իսկ առգրավվել է դպրոցներից:

Փոխարենը, մնացած 14 հատորները դեռ շրջանառության մեջ են, եւ դրանց գլխավոր  «բացասական» հերոսը հրեաներն են:

Ահա թե ինչ են գրում, օրինակ, թուրք մանկագիրները 20-րդ դարի մեծագույն հանճարներից մեկի` Ալբերտ Էյնշտեյնի մասին. «Էյնշտեյնը  կեղտոտ, փնթի եւ բոբիկ մի երեխա էր, որ սիրում էր  օճառ ուտել, չնայած այն տխուր իրողությանը, որ այդ տարիներին գեստապոյականները հրեաներին նետում էին վառարաններն ու նրանցից օճառ էին պատրաստում»:

Մարդկության պատմության ողջ ընկալումը արմատապես փոխած էվոլյուցիոն տեսության հեղինակ Չարլզ Դարվինի անձն ու գործունեությունը եւս չեն վրիպել թուրք մանկագիրների ուշադրությունից: «Դարվինը ծպտված հրեա էր, որն ատում էր իր մեծ քիթը: Նա երկու տասնամյակ վատնեց` ապացուցելու համար իր հեղինակած էվոլյուցիոն տեսությունը` շատ լավ հասկանալով, որ ինքնախաբեությամբ է զբաղված»,- գրված է թուրքական այս ժողովածուում:

Զիգմունդ Ֆրոյդին գրքի հեղինակները բնութագրում են որպես «այլասերվածների հոգեւոր հայր», իսկ Սանտա Կլաուսը, նրանց համոզմամբ, «մի երիտասարդ է, որին հարկավոր է քրեական պատասխանատվության ենթարկել ուրիշների բնակարաններ առանց թույլտվության մուտք գործելու համար»:

Այժմ գրքերի հետագա տարածման դեմ հետեւողական պայքար է սկսել Կրթական համակարգի աշխատակիցների արհմիությունը, որի Ստամբուլի գրասենյակի ղեկավար Մեհմեթ Այդողանը France Press-ի թղթակցի հետ զրույցում ասել է. «Մեր նպատակն է, որպեսզի գրքի բոլոր օրինակներն առգրավվեն, իսկ այն մարդիկ, որոնց պատճառով դրանք  հայտնվել են 10 տարեկան երեխաների ձեռքում, պատասխանատվություն ենթարկվեն»:

http://www.azatutyun.am/content/article/24748758.html