2012 թ. մայիս-օգոստոս ամիսներին թուրքական մամուլում ատելություն պարունակող լուրերի և սյունակների թիրախում ամենից հաճախ հանդիպող խմբերն են հայերը, քրիստոնյաները, հրեաները և հույները, տեղեկացնում է «Ակօս»-ը։
«Հրանտ Դինք» հիմնադրամը հրապարակել է «Մամուլում ատելություն սերմանող նյութերի ուսումնասիրության զեկույց»-ը, որում ամփոփված են 2012 թ. երկրորդ քառամսյակի տվյալները։
Հիմնադրամն այս ծրագիրն իրականացնում է 2009-ից և նպատակ ունի պայքարել լրատվամիջոցների միջոցով էթնիկ և կրոնական խմբերին ուղղված ատելության սերմանման դեմ։
Համաձայն զեկույցի՝ ատելություն պարունակող նյութերի թիվը Թուրքիայում, նախորդ զեկույցի համեմատ, աճել է։
Լրատվամիջոցների ատելության թիրախում ամենից շատ հայտնվել են հայերը, ինչի հիմնական պատճառն այն է, որ Թուրքիայում ահաբեկչական համարվող Քրդական աշխատավորական կուսակցությունը (PKK) կապում են հայերի հետ։
Թուրքական մամուլում պնդումներ կան, թե «Մուսուլման քրդից վնաս չի գա, PKK–ն հայկական շարժում է»։
Զեկույցում նշվում է, որ նույն պատճառաբանությամբ են պայմանավորված նաև քրիստոնյաների և հրեաների դեմ ավելացած ատելություն պարունակող նյութերը։ Աճել է նաև քրդերի հանդեպ ատելություն պարունակող հրապարակումների թիվը։
Leave a Reply