Ստամբուլում հայ-թուրքական համաժողով է կայանալու

Հոկտեմբերի 22-23-ին Ստամբուլում կկայանա համաժողով, որին կմասնակցեն Հայաստանի եւ Թուրքիայի քաղաքացիական հասարակության ավելի քան 50 ներկայացուցիչներ եւ փորձագետներ` քննարկելու ոչ պետական դերակատարների նշանակությունը Հայաստան-Թուրքիա հարաբերություններում: Համաժողովը կմեկնարկի 2012 թ. հոկտեմբերի 22-ին, 14:00, «Հիլթոն Ստամբուլ» հյուրանոցում (Ջումհուրիյեթ պողոտա, 34367 Հարբիյե):

Համաժողովը կազմակերպվում է «Աջակցություն Հայաստան-Թուրքիա հարաբերությունների բարելավմանը» ծրագրի շրջանակներում: Ծրագիրը ֆինանսավորվում է ԱՄՆ Միջազգային զարգացման գործակալության (ԱՄՆ ՄԶԳ) կողմից եւ իրականացվում է Եվրասիա համագործակցություն հիմնադրամի, Երեւանի մամուլի ակումբի, Մարդկային զարգացման միջազգային կենտրոնի եւ Հայաստանի արդյունաբերողների եւ գործարարների (գործատուների) միության միջոցով: Թուրքիայում ծրագրի գործընկերներն են Համաշխարհային քաղաքական զարգացումների կենտրոնը, Հայ-թուրքական բիզնեսի զարգացման խորհուրդը, Անադոլու Քուլթուրը, ԳԱՅԱ հետազոտական ինստիտուտը, Իզմիրի տնտեսագիտական համալսարանի լրատվության  եւ հաղորդակցության բաժինը, Թոփլում Գոնուլուլերի հիմնադրամը, Թուրքական տնտեսական եւ սոցիալական հետազոտությունների հիմնադրամը եւ Թուրքիայի Տնտեսական քաղաքականության հետազոտության հիմնադրամը:

Համաժողովը կամփոփի «Աջակցություն Հայաստան-Թուրքիա հարաբերությունների բարելավմանը» ծրագրի երկամյա աշխատանքի արդյունքները, ձեռքբերումները եւ քաղած դասերը, ինչպես նաեւ հնարավորություն կընձեռի քննարկելու Հայաստան-Թուրքիա հարաբերությունների բարելավման գործընթացում ոչ պետական դերակատարների մասնակցության ռազմավարությունները:

ԱՄՆ ՄԶԳ-ն եւ իր գործընկեր կազմակերպություններն աջակցում են Հայաստան-Թուրքիա հարաբերությունների բարելավմանը՝ խթանելով քաղաքացիական հասարակության համագործակցությունը, հիմնելով եւ զարգացնելով գործարար հարաբերություններ եւ տարածաշրջանային պրոֆեսիոնալների ցանցեր, ինչպես նաեւ սատարելով երկու  ժողովուրդների միջեւ փոխըմբռնման ձեւավորմանը եւ խորացմանը՝ տարածաշրջանում խաղաղության եւ տնտեսական ինտեգրման հասնելու նպատակով:

http://news.am/arm/news/125457.html