Վանի Աղթամար կղզում հայուհու հրաշալի ձայնը զարմացրել է թուրքերին

Արեւմտյան Հայաստան այցելած ուխտագնացներից Լիլիթ Հովհաննիսյանը Վանի Աղթամար կղզու Սուրբ Խաչ եկեղեցում երգել է «Սուրբ, սուրբ» եւ «Տէ’ր, ողորմեա» շարականները, որոնք մեծ արձագանք են գտել կղզի այցելած թուրքերի մոտ:

NEWS.am-ի թղթակցի հետ զրույցում Լիլիթ Հովհաննիսյանը պատմեց, որ ուխտագնացների խմբի հետ այցելել են Աղթամարի Սուրբ Խաչ եկեղեցի, որտեղ եւ կատարել է «Սուրբ, սուրբ»-ը եւ «Տէ’ր, ողորմեա»-ն։ «Առաջին երգի ժամանակ եկեղեցում, բացի հայաստանցի ուխտավորներից, ոչ ոք չկար, ուստի թուրք ոստիկանը թույլատրեց երգել, սակայն երբ սկսեցի կատարել երկրորդ երգը, եկեղեցի մտան մեծ թվով թուրքեր եւ բջջային հեռախոսներով ու տեսախցիկներով անմիջապես սկսեցին տեսագրել իմ կատարումը»,-նշեց Լիլիթը։

Լիլիթի խոսքով՝ երբ եկեղեցի մտած թուրքերի թիվը շատացավ, եկեղեցին հսկող ոստիկանը վախենալով, որ նրանց մեջ կլինեն անձիք, ովքեր կբողոքեն, որ եկեղեցում երգում են, բոլորի ներկայությամբ մոտեցել է իրեն եւ զգուշացրել, որ ներսում երգել չի կարելի։ 

«Երբ հավաքված թուրքերը տեսան, որ ոստիկանն ինձ արգելեց երգել, խիստ արձագանքեցին՝ կշտամբելով նրան։ Իսկ հավաքվածներից մեկն ասաց. «Բավական չէ, որ այդ ազգին կոտորեցինք, կախեցինք, հիմա էլ թույլ չենք տալիս իրենց եկեղեցում անգամ արտահայտվեն…»։ Եկեղեցուց դուրս գալուց հետո շատերը մոտենում էին ինձ եւ ափսոսանք հայտնում, որ ոստիկանն այդպես վարվեց։ Իսկ մի քանիսը նույնիսկ չգիտեին էլ, թե ինչ լեզվով էի երգում», – պատմեց Լիլիթը։

Ի դեպ` Լիլիթը նշեց, որ ինքը ՀՀ ԳԱԱ Մոլեկուլային կենսաբանության ինստիտուտի կրտսեր գիտաշխատող է:

http://news.am/arm/news/125082.html