Հնդիկ ռեժիսոր Շեքհար Կապուրը մտադիր է Հայոց ցեղասպանության մասին ֆիլմ նկարել

Հայտնի հնդիկ ռեժիսոր Շեքհար Կապուրը, հնարավոր է, 1915 թվականին Օսմանյան կայսրությունում տեղի ունեցած հայերի ցեղասպանության մասին ֆիլմ նկարի: Ռեժիսորը մտադիր է մոտ ժամանակներս այցելել Հայաստան, որպեսզի հանգամանալից ուսումնասիրի 1915 թվականի իրադարձությունները: Այս մասին իր բլոգում գրել է ինքը՝ Կապուրը:

«Ուղեւորվում եմ Երեւան: Իսկ Հնդկաստանում կա՞ հայ համայնք: Պատրաստվում եմ մեկնել Հայաստան, որպեսզի ուսումնասիրեմ 1915-ի հայերի կոտորածները եւ, հնարավոր է, ավելի ուշ ֆիլմ կնկարեմ այդ մասին»,- գրել է ռեժիսորը, հաղորդում է india.nydailynews.com-ը:

Հնդիկ ռեժիսորն իր առաջին ֆիլմը՝ «Անմեղը», նկարահանել է 1983 թվականին: Նրան ճանաչում է բերել «Ավազակային թագուհին» կենսագրական ֆիլմը՝ իրական ավազակ կնոջ՝ Պուլա Դեւի մասին: 1998-ին համաշխարհային կինոյի էկրաններ բարձրացավ պատմական «Ելիզավետա» ֆիլմը, որտեղ թագուհու դերը կերպավորել է Քեյթ Բլանշեթը:

http://news.am/arm/news/124888.html