Գեդիքփաշայի հայ բողոքական եկեղեցու վաքըֆն իր առարկությունն է հայտնել իրեն պատկանող գույքի դիմաց որպես փոխհատուցում տրվող գումարի կապակցությամբ

Գեդիքփաշայի հայ բողոքական եկեղեցու վաքըֆն իր առարկությունն է հայտնել իրեն պատկանող գույքի դիմաց որպես փոխհատուցում տրվող գումարի կապակցությամբ:

Այդ մասին հաղորդում է Akunq.net-ը` վկայակոչելով պոլսահայ «Ակօս» շաբաթաթերթը: Աղբյուրի համաձայն` Գեդիքփաշայի հայ բողոքական եկեղեցու վաքըֆը գումարն առարկելուց առաջ դիմել է մասնագետների, որոնք գնահատել են իրեն պատկանող սույն անշարժ գույքը: Գնահատող մասնագետները 550 հազար լիրա են գնահատել Ստամբուլի Գում Գափու թաղամասում գտնվող այդ քառահարկ շինությունը, որը խլվել էր Գեդիքփաշայի հայ բողոքական եկեղեցու վաքըֆից և նախկինում եղել հայ օրիորդաց որբատուն: Եկեղեցին իր առարկությանը կցել է նաև գնահատող մասնագետների զեկույցները:

Հիշեցնենք, որ Գեդիքփաշայի հայ բողոքական եկեղեցու և դպրոցի վաքըֆը դիմել էր, որպեսզի վերադարձներ 1980 թ. պետական գանձարանին անցած այդ անշարժ գույքը և դրական պատասխան ստացել: Դա համարվել էր Թուրքիայում ազգային փոքրամասնության համայնքին տրված «առաջին» փոխհատուցման որոշում:

Ավելի վաղ Akunq.net-ը հաղորդել էր, որ Վաքըֆների գլխավոր տնօրինությունը ընդամենը 147 հազար 143 լիրայի չափով դրամական փոխհատուցում էր սահմանել այս քառահարկ շինության համար, որը 8 բնակարան է ընդգրկում: Գեդիքփաշայի հայ բողոքական եկեղեցու և դպրոցի վաքըֆը որոշել էր բողոքարկել այդ որոշումը:

Վաքըֆի նախագահ Գրիգոր Աղաբալօղլուն թուրքական «Վաթան» պարբերականի հետ զրույցում նշել էր. «Մեզ տրվելիք փոխհատուցումը շատ ծիծաղելի է: Բոլորը Ստամբուլում գիտեն, որ Գում Գափուում տները թանկ են: Այստեղ մեկ բնակարանը 150 հազար լիրայով է վաճառվում: Դժվարանում ենք հասկանալ, թե պետությունն ինչպես է այդ գինը սահմանել: Պետությունը 30 տարի շարունակ այստեղի վարձն է ստացել, վաճառել և գումար վաստակել: Նրանք պետք է Աստծուց վախ ունենան: Այս կառույցը պահանջել ենք դեռևս 5-6 տարի առաջ, երբ հրապարակվեց բարեփոխումների սկիզբ դարձած 4771 թվակիր օրենքը: Սակայն չտվեցին: Հետո, չնայած որ դատական գործ էինք հարուցել, շենքը հապշտապ վաճառվեց ոմն Մուրադ Ասլանի»:

Akunq.net