Թուրքիայի Թունջելի (Դերսիմ) նահանգի Մազգիրթ շրջանում կառուցվում է դամբարան` նվիրված Դերսիմի կոտորածներին զոհ գնացածների հիշատակին: Դամբարանի կառուցման գաղափարը կյանքի է կոչվել հանրության պահանջով: Ֆինանսական ծախսերը հոգում են մասնավոր հովանավորները:
Այս մասին տեղեկացնող CNNTurk լրատվականը հայտնում է, որ դամբարանի բացումը նախատեսված է կատարել սույն թվականի նոյեմբերի 17-ին: Հրավիրյալների մեջ լինելու է նաև եվրախորհրդարանի պատվիրակությունը:
Դամբարանը բաղկացած է լինելու 38 շիրմաբեկորներից և հավերժական կրակից, որոնք խորհրդանշելու են 1937-38 թթ. Դերսիմի արյունահեղ սպանդը: Այդ տարիներին թուրքական զորքերը բռնկված ապստամբությունը ճնշելու համար կոտորեցին տասնյակ հազարավոր դերսիմցիների, ավերեցին հազարավոր գյուղեր: 2011 թ. Թուրքիայի վարչապետ Ռեջեփ Թայիփ Էրդողանը պետության անունից ներողություն է խնդրել Դերսիմի կոտորածների համար:
Նշենք, որ Դերսիմը գտնվում է Վանա լճից հյուսիս-արևմուտք ընկած գոտում: Այն կիսանկախ է եղել Օսմանյան կայսրության գոյության ամբողջ ընթացքում: Դերսիմցիները խոսում են զազաերեն: Թեև քրդերը պնդում են, որ դերսիմցիները քրդական էթնոսից են, բայց Դերսիմի բնակչությունը մերժում է այդ տեսակետը: Պատմաբան Նիկողայոս Ադոնցի համոզմամբ՝ դերսիմցիները հայոց պավլիկյան աղանդավորական շարժման հետևորդներն են:
Leave a Reply