Հայոց ցեղասպանության վերաբերյալ օրինագիծ Իտալիայի խորհրդարանում

Իտալիայի խորհրդարանում շրջանառության մեջ է դրվել օրինագիծ, որով ապրիլի 24-ը Իտալիայում  պետականորեն կհամարվի Հայոց ցեղասպանության զոհերի հիշատակի օր:

Այս մասին Ազգային ժողովի նախագահ Հովիկ Աբրահամյանի հետ հոկտեմբերի 12-ին  կայացած հանդիպման ժամանակ հայտնել է Իտալիա-Հայաստան պատգամավորական բարեկամության խմբի ղեկավար Սանդրա Ձամպան:

Նա շնորհակալություն է հայտնել Հայաստան այցելելու հրավերի համար և կարևորել նման հանդիպումները միջպետական և  միջխորհրդարանական կապերը զարգացնելու առումով: Սանդրա Ձամպան բարձր է գնահատել հայ ժողովրդի ներդրումը եվրոպական և մասնավորապես  իտալական մշակույթի, գիտության, տնտեսության և այլ ոլորտներում: Ըստ նրա, հայերը դարեր շարունակ մեծ հետք են թողել եվրոպական մշակույթի և տնտեսության մեջ: «Այժմ Եվրոպան պետք է  վերադարձնի ձեզ  այն, ինչ դուք երկար տարիներ ներդրել եք Եվրոպայում և պիտի զորավիգ լինի ձեր պետության կայացմանը»,-նշել է իտալացի պատգամավորը:

Ինչպես «Փաստինֆո»-ին հայտնեցին ԱԺ հասարակայնության և տեղեկատվության միջոցների հետ կապերի վարչությունից, Հայաստան ժամանած Իտալիայի Հանրապետության Սենատի և Պատգամավորների պալատի Իտալիա-Հայաստան պատգամավորական բարեկամության խմբի անդամները ներկայացնում են խորհրդարանում գործող հիմնական խմբակցությունները:

Պատվիրակությանն ընդունած ԱԺ նախագահը կարևորել է Իտալիայի խորհրդարանական պատվիրակության այցը Հայաստան և նշել, որ  այն, վստահաբար,  նոր էջ կբացի ինչպես առհասարակ հայ-իտալական, այնպես էլ միջխորհրդարանական հարաբերություններում: Ըստ Հ.Աբրահամյանի, երկկողմ հարաբերությունները ունեն զարգացման լավ հեռանկարներ քաղաքական, տնտեսական, մշակութային և այլ բնագավառներում:

Հանդիպմանը  անդրադարձ է եղել տարածաշրջանային  խնդիրներին, հայ-թուրքական հարաբերություններին, ԼՂ հիմնախնդրի կարգավորմանը: ԱԺ նախագահը նշել է, որ Ադրբեջանում պետական մակարդակով արմատավորված հայատյացության մթնոլորտը պետք է բավարար հիմք հանդիսանա միջազգային հանրության համար հասկանալու, որ ոչ մի դեպքում և ոչ մի ձևաչափով Արցախը չի կարող մաս կազմել մի երկրի, որը հերոսացնում է սաֆարովների կերպարը: Նշվել է նաև, որ իր այս քայլով  Ադրբեջանը հերթական անգամ վտանգում է  տարածաշրջանային փխրուն անվտանգությունը, ոտնահարում միջազգային իրավական փաստաթղթերով երաշխավորված մարդու իրավունքները, կրկին անգամ ի ցույց դնում Լեռնային Ղարաբաղի հիմնախնդրի խաղաղ կարգավորման բանակցային գործընթացը փակուղի տանելու և դրանում միջազգային հանրության, մասնավորապես՝ ԵԱՀԿ Մինսկի խմբի համանախագահների կատարած աշխատանքը ձախողելու իր հետևողական քաղաքականությունը:

«Բաքուն հայատյացությունը դարձրել է պետական քարոզչություն՝ հասցնելով այն առավել քան վտանգավոր մակարդակի: Սա միայն մեր գնահատականը չէ. այս մասին ահազանգում են նաև միջազգային կառույցները: Մենք հավատարիմ ենք մնում Լեռնային Ղարաբաղի հիմնախնդրի խաղաղ կարգավորման` ԵԱՀԿ Մինսկի խմբի եռանախագահների միջնորդությամբ ընթացող գործընթացին»,-շեշտել է Հովիկ Աբրահամյանը:

ԱԺ նախագահը շնորհակալություն է հայտնել իտալացի  պատգամավորներին, որ մերժել են Իտալիայի խորհրդարանում շրջանառության մեջ դրված Լեռնային Ղարաբաղի վերաբերյալ Ադրբեջանի տեսակետները արտահայտող և խիստ միակողմանի բնույթ կրող բանաձևը: Ի պատասխան` տիկին Ձամպան նշել է, որ ադրբեջանամետ բանաձեւը մերժվել է, քանի որ այն չէր արտահայտում Իտալիայի տեսակետը հիմնախնդրի կարգավորման վերաբերյալ և չէր համապատասխանում Իտալիայի դիրքորոշմանը միջազգային ատյաններում:

http://www.pastinfo.am/node/2249