Բեռլինում Օսմանյան կայսրությունում ցեղասպանության ենթարկվածների հուշահամալիր է կառուցվում

Բեռլինում 20-րդ դարասկզբին Օսմանյան կայսրությունում ցեղասպանության ենթարկված ավելի քան 3.5 մլն քրիստոնյաների հիշատակին էկումենիկ հուշահամալիր է կառուցվում: Դրա նախաօծման արարողությունը տեղի կունենա հոկտեմբերի 13-ին:

Ինչպես «Արմենպրես»-ին տեղեկացրեց գերմանուհի հայտնի իրավապաշտպան, Գերմանիայում Ցեղասպանության ճանաչման հանձնախմբի ղեկավար Թեսա Հոֆմանը, Բեռլինի ավետարանական Լուիզեն եկեղեցու բակում` հիմնական մուտքի դեմ դիմաց` հուշարձանների պահպանվող տարածքում, ծրագրված է մինչեւ 2015 թվականը էկումենիկ հուշահամալիր կառուցել` նվիրված Օսմանյան կայսրությունում ցեղասպանության ենթարկված քրիստոնյաների հիշատակին: Հուշարձանը կդառնա սգո հասարակական վայր: 

Հիմնաքարի տեղադրման ընդունված արարողության փոխարեն ծրագրվում է նախաօծում կատարել եւ  հոկտեմբերի 13-ին` գերմանական ժամանակով ժամը 15.00-ին, ստեղծվելիք հուշահամալիրն առաջին անգամ ներկայացնել հանրությանը եւ, ամենից առաջ, Բեռլինում բնակվող հայերի, ասորիների, Փոքր Ասիայի, Պոնտոսի  հունական համայնքների ներկայացուցիչներին: Հայ առաքելական, Սիրիայի ուղղափառ եւ հույն ուղղափառ եկեղեցիների հոգեւոր այրերն օծման աղոթք կկարդան:

Հուշարձանի վրա ցեղասպանված եւ ցեղասպանությունից վերապրած ժողովուրդների լեզուներով գրված է «Ի հիշատակ նահատակաց»:

Օսմանյան կայսրությունում իրագործված ցեղասպանության քրիստոնյա զոհերի հիշատակին էկումենիկ հուշահամալիրի կառուցումը նախաձեռնել է 2012-ի սկզբին հիմնադրված բարեգործական հասարակական միությունը:

Նախաձեռնության հեղինակներն այսպիսով նաեւ ցանկանում են հերթական անգամ հիշեցնել, որ 20-րդ դարի սկզբին այսօրվա Թուրքիայի տարածքում բնակվում էին ավելի քան 5 մլն քրիստոնյաներ` հայեր, ասորիներ, հույներ: Նրանցից ավելի քան 3 մլն-ը օսմանյան կայսրության պետական հրամանով ցեղասպանվել եւ բնաջնջվել են կոտորածների, հարկադիր աշխատանքի եւ արտագաղթի միջոցով: Վերապրած եւ Եվրոպայում իրենց հանգրվանը գտած քրիստոնյաների ժառանգներին միավորում է իրենց ցեղասպանված նախնիների հիշատակը հարգելու եւ թուրքական անմարդկային քայլերը դատապարտելու պահանջը:

Մինչ օրս ոչ միայն Բեռլինում, այլև` այլ քաղաքներում բացակայում են այն վայրերը, որտեղ 20-րդ դարասկզբի ցեղասպանության զոհերի հիշատակին անձնական կամ հասարակական սգո արարողություններ կարող են կատարվել:

Գերմանիայի Բունդեսթագը Հայոց ցեղասպանությունը ճանաչել եւ դատապարտել է 2005թ. հունիսի 15-ին: 20-րդ դարասկզբի առաջին ցեղասպանությանը զոհ է գնացել ավելի քան 1,5 միլիոն հայ: 

http://armenpress.am/arm/news/695418/a-memorial-dedicated-to-the-victims-of-genocide-in-the-ottoman-empire-will-be-built-in-berlin.html