Ռուսաստանի կողմէ եւս լուսաբանութիւն մը կատարուեցաւ Սուրիական ճամբորդական օդանաւին մասին։ Ռուսաստանի լրաքաղութեան բաժնի պատասխանատուներէն Մարիա Զախարովա յայտնեց, որ օդանաւին մէջ կային 35 ճամբորդներ, որոնցմէ 17-ը ռուս էին։ Ռուսաստան պաշտօնական տեղեկութիւն պահանջած է Թուրքիայէն։
Միւս կողմէ` Թուրքիոյ հասցէին շատ ծանր արտայայտութիւն ունեցաւ Իրաքի վարչապետ Նուրի Էլ Մալիքի, որ Մոսկուա կը գտնուի։ Ան, Բութինին հետ տեսակցութիւն մը ունենալէ վերջ, լրագրողներուն յայտարարութիւն ըրաւ եւ ըսաւ, որ Թուրքիա շատ լիրբ ոճով կը խօսի, ու միջազգային հանրութիւնը պէտք է արգելք ըլլայ Թուրքիոյ այս ընթացքին։ Մալիքի ըսաւ, որ Սուրիոյ կողմէ Թուրքիոյ հասցէին որեւէ վտանգ կամ սպառնալիք չկայ, Թուրքիա պէտք է դադրեցնէ պատերազմի գրգռութիւնն ու ՆԱԹՕ-ն այս խնդրին միջամուխ դարձնել ուզելու իր աշխատանքէն։ «Եթէ ՆԱԹՕ-ն միջամտէ Սուրիոյ, այն ատեն պատերազմը կը տարածուի ամբողջ հողատարածքին վրայ», – ըսաւ Մալիքի Մոսկուայի մէջ։
Leave a Reply