Կիրո Մանոյան. «Հայ-թուրքական արձանագրությունները մեռած չեն»

«2009-ի հոկտեմբերի 10-ին Ցյուրիխում կնքված հայ-թուրքական արձանագրությունները դեռեւս կենդանի են եւ Ցեղասպանության 100 տարելիցի նախօրյակին ներազգային լուրջ պառակտման առիթ կդառնան»,-լրագրողների հետ հանդիպմանը հայտարարեց ՀՅԴ Հայ դատի եւ քաղաքական հարցերով գրասեենյակի պատասխանատու Կիրո Մանոյանը:

Դեռեւս իրավաբանորեն երկու երկրների քաղաքական օրակարգում գտնվող արձանագրություններն, ըստ Մանոյանի, հարմար պահին, ասենք՝ Մեծ Եղեռնի 100-ամյա տարելիցի նախօրյակին, կարող են օգտագործվել Անկարայի կողմից:

Նրա խոսքերով, Թուրքիան չտալով ոչինչ` արձանագրությունների կնքումով ստացավ շատ բան, մասնավորապես` հնարավորություն ստացավ դանդաղեցնել Ցեղասպանությսն ճանաչման եւ հատուցման գործընթացը, եւ միջամտել Արցախյան գործընթացին, ինչը չկար մինչ այդ:

Մինչդեռ, ըստ Կիրո Մանոյանի, Հայաստանը, «ավելի ճիշտ՝ Հայաստանի իշխանությունները» արձանագրությունների կնքումով միայն որոշ երկրների աչքում հուսալի գործընկերոջ համարում ձեռք բերեցին:

Հենց այդ պատճառով ՀՅԴ ներկայացուցիչը վստահ է, որ գոնե մինչեւ գալիք նախագահական ընտրությունները իշխանությունները չեն փորձի չեղյալ հայտարարել արձանագրությունները, «որպեսզի չխաթարեն հուսալի գոծընկերոջ իմիջը»:

«Իսկ ինչ կլինի՞, եթե Թուրքիան որոշի վավերացնել արձանագրություններից մեկը, որը գործողությունների ժամանակացույց չի ենթադրում, այսինքն՝ չի ստիպում կոնկրետ ժամանակի ընթացքում վերացնել շրջափակումը եւ բացել սահմանը», հարցադրեց Մանոյանը:

Ըստ նրա` այդ դեպքում Հայաստանը ստիպված կլինի կամ վավերացնել իրեն կրկին ոչինչ չտվող արձանագրությունը, կամ փչացնել «հուսալի գործընկերոջ» իմիջը՝ հրաժարվելով վավերացնել այն:

http://www.a1plus.am/am/politics/2012/10/10/kiro-manoyan