Թուրքիայում մեծ աղմուկ հանած «Մեծ մորս դաջվածքները» ֆիլմը կցուցադրվի մի շարք երկրներում

Թուրքիայում մեծ աղմուկ հանած «Մեծ մորս դաջվածքները» ֆիլմն ընդլայնում է իր աշխարահագրությունը: Այն կցուցադրվի Ճապոնիայում, Լեհաստանում և Հունաստանում: Այս մասին «Արմենպրես»-ի հետ զրույցում հայտնեց շվեդահայ հայնտի ռեժիսոր Սյուզան Խարդալյանը՝ շեշտելով, որ ֆիլմը սպասվածից ավելի մեծ հաջողություններ է գրանցել: «Շատ զարմացա, երբ իմացա, որ ֆիլմը ցուցադրվելու է այդ երկրներում, ինչը վկայում է այն մասին, որ իրազեկ հանդիսատեսի թիվը գնալով աճում է: Միայն ութ անգամ «Մեծ մորս դաջվածքները» ցուցադրվել են «Ալ Ջազիրա»-ով, որը միլիոնավոր հեռուստադիտողներ ունի»,-ասաց ֆիլմի ռեժիսորը:

Անդրադառնալով թուրքական արձագանքներին` Խարդալյանն ընդգծեց, որ Թուրքիան երկու անգամ փորձեց կասեցնել ֆիլմի ցուցադրումը, սակայն դա նրան չհաջողվեց: «Մեծ մորս դաջվածքները» ֆիլմը ցուցադրվեց և՛ Ստամբուլում, և՛ Շվեդիայում` անկախ Թուրքիայի ցանկությունից:

Հոկտեմբերի 9-ին «Շուշի Արթ Փրոջեքթ»-ի շրջանակներում ֆիլմը ցուցադրվեց Շուշիի «Նարեկացի» արվեստի տանը և, Խարդալյանի խոսքով, մեծ հաջողություն գրանցեց:

Խոսելով նոր նախագծերից և ֆիլմերից` շվեդահայ ռեժիսորը, չցանկանալով փակագծերը շատ բացել, միայն ասաց, որ մի ֆիլմի նկարահանումներ են սկսվելու արաբական երկրներում, որի աշխատանքները, հավանաբար, կավարտվեն 2014 թվականին:

http://armenpress.am/arm/news/695810/turqiayum-mets-axmuk-hanats-mets-mors-dajvatsqnery-filmy.html