Թուրքական բազմաթիվ դպրոցներ քուրդ զինյալների կողմից հարձակման են ենթարկվել

Թուրքական Շըրնաք նահանգի 8 դպրոցներ այսօր առավոտյան նույն ժամին մոլոտովյան կոկտեյլներով և ինքնաշեն պայթուցիկներով հարձակման են ենթարկվել։ Վնասվածքներ են ստացել մեկ աշակերտ և երկու ուսուցիչ։

Ինչպես տեղեկացնում է թուրքական «Վաթան»-ը, հարձակումը միայն այս մարզում չի եղել։ Հարձակման են ենթարկվել նաև Դիարբեքիրի մի շարք դպրոցներ։

Դիմակավոր անձինք առավոտյան մտել են դպրոցներ և պայթուցիկները նետել ուսուցչանոցում ու տարբեր դասասենյակներում։ Թուրքական կողմի պնդմամբ՝ հարձակման հեղինակը Քրդական աշխատավորական կուսակցության (PKK) համակիրներ են եղել։

Միջադեպերից հետո գրեթե բոլոր բնակավայրերում փակվել են բոլոր աշխատավայրերը՝ բացառությամբ դեղատների և հացի փռերի։ Ոստիկանությունը նախազգուշական միջոցառումներ է ձեռնարկում՝ հետագա հարձակումները կանխելու ուղղությամբ։

http://tert.am/am/news/2012/10/09/pkk-schools/