Քրդական բանվորական կուսակցությունը պայթեցրել է Իրան-Թուրքիա գազատարը

Թուրքիայում ահաբեկչական համարվող Քրդական բանվորական կուսակցությունը շարունակում է տարատեսակ գործողություններ իրականացնել: Այս անգամ Քրդական բանվորական կուսակցությունը պայթեցրել է Իրան-Թուրքիա գազատարը, որի հետևանքով երկու երկրների միջև գազամատակարարումը դադարեցվել է: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:

«Աշխատանքներ են տարվում պարզելու համար, թե գազատարի պայթյունի հերևանքով Իրան-Թուրքիա գազատարը ինչքան վնաս է կրել: Միայն դա պարզելուց հետո է հնարավոր ասել, թե երբ գազատարը կրկին հնարավոր կլինի շահագործել»,- հայտնել է էներգետիկ ոլորտի աշխատակիցներից մեկը:

Պայթյունը տեղի է ունեցել վաղ առավոտյան` տեղական ժամանակով 04:20-ին Դողուբայազըդի Թանըքթեփե գյուղում: Թուրքական Radikal պարբերականի փոխանցմամբ` քրդական կուսակցության անդամները, նախօրոք փոս փորելով, պայթուցիկ են տեղադրել գազատարի շրջանում, ինչից հետո հարմար պահին հեռակառավարման վահանակի միջոցով պայթեցրել են այն: Պայթյունից հետո գազը սկսել է տարածվել շրջակա տարածքում: Գյուղի բնակիչները, արթնանալով պայթյունի ձայնից և զգալով գազի հոտը, խուճապի են մատնվել: Թուրքական անվտանգության աշխատակիցներն անմիջապես սկսել են աշխատանքներ տանել վթարը վերացնելու, ինչպես նաև հնարավոր հետագա ահաբեկչական գործողությունները կանխելու նպատակով:

http://armenpress.am/arm/news/695609/qrdakan-banvorakan-kusakcutyuny-paytecrel-e-iran-turqia.html