Հայաստանը չի վարում համապատասխան խիզախ արտաքին քաղաքականություն. Հարութ Սասունյան

ԱՄՆ–ում հրատարակվող «Կալիֆոռնիա Կուրիեր» թերթի խմբագիր Հարութ Սասունյանը, թեև Հայաստանի արտաքին քաղաքականությունը նորմալ է գնահատում, քանի որ ո՛չ մեծ ձախողություններ են արձանագրվել այս տարիներին, ո՛չ էլ նվաճումներ, բայց իր փոքրիկ բողոքն, այդուհանդերձ, հայտնում է:

«Իմ փոքր բողոքն այն է, որ Հայաստանը, փոքր երկիր լինելով, այդ պարագայում չի վարում համապատասխան խիզախ արտաքին քաղաքականություն, իհարկե՝ առանց ծայրահեղությունների գնալու: Ես կարծում եմ, որ ժամանակ առ ժամանակ կարելի է մի քիչ ավելի խիզախ լինել»,- այսօր հրավիրված ասուլիսին ասաց նա և նշեց, որ եթե Հայաստանն ունի 2%-ի շահ, պետք է դրանից օգտվի:

«Հասկանալի է, որ երկիրը շրջափակված է թշնամիներով, տնտեսական խնդիր կա, պարտավոր ենք հաշվի նստել բոլորի հետ, բայց օրինակ՝ հայ-թուրքական հարաբերություններում ավելի լավ փաստաթուղթ կարող էինք պատրաստել»,- ասաց նա:

Հարութ Սասունյանը կոնկրետ Հայոց ցեղասպանության հարցում յուրահատուկ մոտեցում է պահանջում: Ըստ նրա, այլևս հարկ չկա, որպեսզի հայկական կողմը շարունակի պահանջել Հայոց ցեղասպանության ճանաչումը:

«Մենք անընդհատ խոսում ենք Հայոց ցեղասպանության միջազգային ճանաչման հետապնդման մասին, բայց ես չեմ գտնում, որ դա իմաստալից է: Հայոց ցեղասպանությունն արդեն լայն ճանաչում գտել է»,- ասաց նա և թվարկեց այն երկրները, այդ թվում նաև միազգային կառույցները, որոնք ճանաչել են այն: Իսկ թուրքերի դեպքում, նրանց ամոթանք տալով, ըստ նրա, պետք է այլ բանաձև առաջ քաշել:

«Այլևս իմաստ չունի ճանաչում հետապնդել, դա նույնիսկ վնասում է, քանի որ արդեն ստացել ենք դա, իսկ ոչ մի առաջխաղացում չի նկատվում մեր իսկական պահանջների նկատմամբ: Երբ ամեն անգամ ճանաչում ենք պահանջում, թուրքերը ուրախանում են, քանի որ այդ փուլի վրա կանգնած ենք մնացել»,– բացատրեց դա:

«Մենք գիտենք, որ Ցեղասպանությունը եղել է, աշխարհը գիտի, մենք չենք կարող ստիպել թուրքերին ճանաչել ո՛չ ուժով, ո՛չ էլ փաստաթղթերով, ուրեմն թողնենք թուրքերին. ինչ ուզում են` անեն»,- ասաց նա և ավելացրեց, որ իր բանաձևն այն է, որ հայկական կողմն արդեն պետք է պահանջի արդարություն:

«Սա գլոբալ արտահայտություն է գուցե, բայց Հայաստանի կառավարությունը պետք է հետապնդի իր քայլերը՝ ելնելով այն հսկա անարդարության դեմ, որը մեր ժողովրդի նկատմամբ է իրականացվել»,- ասաց նա և ավելացրեց, որ եթե Հայաստանի կառավարությունն ի վիճակի չէ փողային պահանջ ներկայացնել հզոր, հարևան թշնամի երկրին, ապա այդ մասով արդեն պետք է ավելի վճռական լինի սփյուռքահայությունը:

«Սփյուռքահայությունը կարող է շատ հեշտությամբ փողային պահանջ ներկայացնել և ավելի ագրեսիվ պահանջներ: «Արդարության» ոչ հստակ տերմինն ավելի ձեռնտու է, քան պարզ «ճանաչումը»: Պետք է պահանջենք մեր Արևմտահայաստանը և պահանջենք մեր սեփականությունը՝ տուն, հող նաև բանկային հաշիվները՝ բոլոր վնասներով»,- ասաց նա:

Անդրադառնալով Հայաստան-սփյուռք հարաբերություններին, Հարութ Սասունյանը խոստովանում է, որ դրանք կատարյալ չեն:

«Սփյուռքի նախարարությունը որոշակի բաներ անում է, բայց շատ խնդիրներ կան, որ կատարյալ չեն: Հիմնական պատճառն այն է, որ Հայաստանը, ընդհանուր առմամբ, ակտիվ ձևով չի հետապնդում ամուր կապեր հաստատելու ո՛չ փափագը և ո՛չ էլ միջոցները»,– ասաց նա:

«Հաջորդ խնդիրը. սփյուռք ասելով` հասկանում ենք մեկ կառույց և մեկ միավոր, բայց սփյուռքը մեկ կառույց չէ, հարյուրավոր համայնքներ են»,- նշեց նա և այս խնդիրը լուծելու համար անհրաժեշտություն համարեց սփյուռքի մեկ կառույցի ստեղծումը:

«Ամեն մի հայ ընտրում է իր շրջանից պատգամավորի կամ ներկայացուցչի: Մոտ 350 պատգամավոր կլինի, և այդ կառույցի հետ կապվելով` հարկ է համադրել աշխատանքները»,- ասաց նա և համոզմունք հայտնեց, որ հայկական եռամիասնությունը՝ Սփյուռք-Հայաստան-Արցախ, արդեն կազմակերպված կհամագործակցեն:

http://tert.am/am/news/2012/10/09/harout-sassounian/