Թուրքիան կարող է միակ հայկական գյուղին զրկել ինքնակառավարման իրավունքից

Հաթայ նահանգի Սամանդաղ գավառի միակ հայկական գյուղը նոր ՏԻՄ կանոնակարգով կարող է զրկվել ինքնակառավարման իրավունքից:

Թուրքիայի ներքին գործերի նախարար Իդրիս Նաիմ Շահինը հայատարել է, որ նախապատրաստվում է նոր ՏԻՄ օրենք, ինչի համաձայն 2000-ից պակաս բնակչություն ունեցող գյուղերը կզրկվեն ինքնակառավարման իրավունքից և գյուղապետարան (բելեդիյե) ունենալու հնարավորությունից:

Սա նշանակում է, որ այդ կարգի բնակավայրերը կլինեն ամենամոտ գյուղի ենթակայության, որն ունի 2000-ից ավելի բնակչություն կամ կմիավորվեն որևէ գյուղի կամ գյուղերի հետ, որպեսզի ապահովվի անհրաժեշտ բակչության թվաքանակը:

Թուրքիայի Հաթայ նահանգում գտնվող միակ հայկական գյուղը` Վաքըֆլըն, այսօր ունի շուրջ 320 բնակիչ, սակայն գյուղի ծխական կամ բնակչության մատյանում գրանցված են ընդամենը 1937 բնակիչներ: Գրանցվածները հիմնականում բնակվում են Ստամբուլում կամ եվրոպական այլ երկրներում:

Որպեսզի գյուղը պահապանի իր ինքնակառավարման իրավունքը, անհրաժեշտ է, որ առնվազն 64 նախկին բնակիչներ գրանցվեն գյուղում և ապահովեն անհրաժեշտ բնակչության թիվը:

Թուրքիայի ներքին գործերի նախարարության տվյալներով ինքնակառավարման իրավունքից զրկվելու վտանգի առաջ են կանգնած շուրջ 18 հազար բնակավայրեր: Սակայն այդ 18 հազարի ճակատագիրը չի կարելի նույնացնել Թուրքիայի միակ հայկական գյուղի ճակատագրի հետ:

http://www.armweeklynews.am/awn/ms12/ms_1148.htm