Լրագրողների համահայկական համաժողովի մասնակիցները հայտարարություն են տարածել

Լրագրողների համահայկական 6-րդ համաժողովի մասնակիցները հանդես են եկել հայտարարությամբ: «Հայոց Ցեղասպանության 100-րդ տարելիցին ընդառաջ» խորագրով անցկացվող համաժողովի մասնակիցների հայտարարությունում մասնավորապես կարեւորել են հայկական լրատվամիջոցների եւ հատկապես օտարալեզու մամուլում գործող հայ լրագրողների վճռական, ազդեցիկ եւ մասնագիտական դերը Հայոց ցեղասպանության, արդարության վերականգնման, Հայ Դատի հիմնախնդիրները ներկայացնելու, միջազգային ատյաններ հասցնելու եւ տարբեր երկրներում պետական, հասարակական, կարծիքի ձեւավորման գործում: Մասնակիցները հայտարարել են, որ համաժողովի ընթացքում ներկայացված Ցեղասպանությանը նվիրված մասնագիտական 3 տասնյակից ավելի զեկուցումները, դրանց քննարկումները եւ մտքերի փոխանակությունը հերթական անգամ հաստատեցին Հայաստանի Հանրապետության, Լեռնային Ղարաբաղի Հանրապետության եւ Սփյուռքի հայ լրագրողների հետզհետե ակտիվացող համագործակցությունը՝ ի շահ համազգային հիմնախնդիրների լուծման եւ ի շահ Հայոց ցեղասպանության ճանաչման, դատապարտման:

Հայտարարության տեքստում հայկական լրագրողական համայնքի անդամները դիմել են միջազգային հանրությանը եւ այն պետությունների իշխանություններին, որոնք չեն ճանաչել Հայոց ցեղասպանության փաստը, թոթափել անտարբերությունը՝ չմոռանալով, որ հենց այդ ախտանիշն է բոլոր կործանումների եւ չարիքների հիմքը: Ճանաչել եւ դատապարտել 1915 թվականին Օսմանյան կայսրության կողմից իրականացված Հայոց ցեղասպանությունը, նշանակում է մարդկությանը հեռու պահել հետագա չարիքներից, ցեղասպանություններից: Իրենց հայտարարությամբ մասնակիցները պահանջել են Թուրքիայի եւ Ադրբեջանի իշխանություններին ընդունել եւ հատուցել Օսմանյան Թուրքիայում իրականացված Հայոց ցեղասպանությունը եւ տարբեր ժամանակներում հայ ժողովրդի նկատմամբ գործած հանցանքները:

Մասնակիցները կոչ են արել 100 հազարավոր ծպտյալ կրոնափոխ հայերին վերադառնալ իրենց հայկական ինքնությանն ու արմատներին:

Նշենք, որ համաժողովը կազմակերպվել է Սփյուռքի նախարարության նախաձեռնությամբ:

http://www.news.am/arm/news/123909.html