Թուրքիան գիտական և ակադեմիական շրջանակներում պարտադրված է լինելու ընդունել Հայոց ցեղասպանության փաստը. Տիգրան Սարգսյան

Հայաստանը մեծապես կարևորում է, որ Թուրքիայում ձևավորվել է ազատամիտ, Հայոց ցեղասպանության փաստն ընդունող մտավորականների խավ, որը փորձում է օբյեկտիվ կերպով փաստերը ներկայացնել նաև թուրք հասարակությանը: Ինչպես հաղորդում է «Արմենպրես»-ը` այս մասին Աղավնաձորում հայտարարեց ՀՀ վարչապետ Տիգրան Սարգսյանը` լրագրողների համահայկական վեցերորդ համաժողովի մասնակիցների հետ հանդիպման ժամանակ:

«Թուրքիան բազմաթիվ միջազգային կառույցներում, այդ թվում ակադեմիական և գիտական շրջանակներում պարտադրված է լինելու ընդունել Հայոց ցեղասպանության վերաբերյալ իրականությունը, ժամանակն ամեն ինչ դնելու է իր տեղը: Այդ ճշմարտությունը պետք է ոչ միայն հայ, այլև թուրք ժողովրդին»,- ասաց վարչապետը` պատասխանելով Ստամբուլում լույս տեսնող հայկական «Ժամանակ» օրաթերթի գլխավոր խմբագիր Արա Գոչունյանի հարցին:

Տիգրան Սարգսյանի խոսքով` Հայաստանը չի կարող նահանջել իր ճշմարիտ, արդար սկզբունքներից: «Մեր պայքարը պետք է շարունակենք` անկախ նրանից, թե Թուրքիան ինչ հակաքայլերի է դիմելու: Սա չի կարող լինել քննարկման առարկա»,- ասաց Տիգրան Սարգսյանը:

http://armenpress.am/arm/news/695472/turqian-gitakan-ev-akademiakan-shrjanaknerum-partadrvats.html