PKK-ն թուրքական բեռնատարներ է այրել` առևանգելով նաև վարորդներին

Թուրքիայի հարավ-արևելյան Հաքարի նահանգում «Քրդստանի աշխատավորական կուսակցության» (PKK) անդամներն ավտոճանապարհի վրա հարձակում են իրականացրել թուրքական բեռնատարների վրա` հրդեհելով դրանք:

Այս մասին տեղեկացնում է թուրքական «Սոնդաքիքա» կայքը:

Հաքքարիի Շեմդինլի շրջանում PKK-ականները կտրել են թուրքական հենակետ պարեն տեղափոխող բեռնատարների ճանապարհը: Առևանգելով վարորդներին` քրդերը կրակի են տվել բեռնատարները:

Դեպքը տեղի է ունեցել երեկ երեկոյան: Նշենք, որ սա առաջին դեպքը չէ, երբ PKK-ականները Թուրքիայում բեռնատարներ են այրում:

Հիշեցնենք, որ «Քրդստանի աշխատավորական կուսակցությունը» (Partiya Karkerên Kurdistan կամ PKK) քրդական մարքսիստական-լենինիստական ուղղվածության կազմակերպություն է, որի նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքների վրա Քրդստան անկախ պետության հիմնումը: Կազմակերպությունը հիմնադրվել է 1978 թվականին, Դիարբեքիրում (Աղձնիք նահանգ)՝ Աբդուլլահ Օջալանի (Ափո) կողմից, ով ներկայումս ցմահ ազատազրկում է կրում թուրքական Իմրալը կղզու բանտում:

Կազմակերպությունն ակտիվ ռազմական գործողություններն սկսել է 1984 թ.-ին: Թուրքական իշխանությունների դեմ մղվող շուրջ 30 տարվա պայքարի ընթացքում զոհվել է մոտ 45 հազար մարդ: PKK-ն ահաբեկչական կազմակերպությունների շարքին են դասում ԱՄՆ-ն, ԵՄ-ն, մի շարք այլ երկրներ:

http://haynews.am/hy/1349426841