Թուրքիան Սիրիայի դեմ գործողություններով հայությանը վնասելու ակնհայտ միտում ունի. Ռուբեն Սաֆրաստյան

Թուրքիայի խորհրդարանի կողմից Սիրիայում թուրքական զինված ուժերին անդրսահմանային ռազմական գործողություններ թույլատրող որոշումը Թուրքիայի վարած ռազմավարության տրամաբանական հանգրվանն էր: Արդեն մեկ տարուց ավելի է` ինչ Թուրքիան հանդես է գալիս Սիրիայի որոշ տարածքներ օկուպացնելու բացահայտ որոշմամբ: «Արմենպրես»-ի հետ զրույցում նման տեսակետ հայտնեց Արևելագիտության ինստիտուտի տնօրեն Ռուբեն Սաֆրաստյանը`հավելելով, որ այս գործողություններն ուղղված են նաև Սիրիայի հայ համայնքի դեմ` միտում ունենալով խուճապ առաջացնել հայության շրջանում:

«Ինձ հետաքրքրում է մի հանգամանք ևս, քանզի որոշ հաղորդագրություններ կային, որ թուրքական բանակը շատ ավելի շուտ էր առաջ գնացել, քան տեղի էր ունեցել այդ պայթյունը թուրքական տարածքի վրա: Փաստորեն, կարող ենք ենթադրել, որ այս ամենը վաղօրոք ծրագրված էր, և դա պարզապես պրովոկացիա էր»,- հայտնեց Սաֆրաստյանը:

Անդրադառնալով Սիրիայի հայության վիճակին և այն հարցին, թե ինչ վտանգներով է լեցուն այս որոշումը` Սաֆրաստյանը շեշտեց, որ Թուրքիան հստակ ծրագիր ունի` ուղղված հատկապես հալեպահայության դեմ:

«Սիրիահայությունը և հատկապես հալեպահայությունը Ցեղասպանություն վերապրած հայության սերունդ են, և Թուրքիան այս գործողությունների շրջանակներում հայությանը վնասելու ակնհայտ միտում ունի»,- եզրափակեց Սաֆրաստյանը:

Հոկտեմբերի 4-ին Թուրքիայի խորհրդարանի կողմից Սիրիայում թուրքական զինված ուժերին անդրսահմանային ռազմական գործողություններ թույլատրող որոշում ընդունվեց, որից հետո այդ երկրի փոխվարչապետ Բեշիր Աթալայը հայտարարեց, թե «դա Սիրիայի դեմ պատերազմ հայտարարել չի նշանակում»:

Հոկտեմբերի 3-ին գումարվել է Հյուսիսատլանտյան խորհրդի նիստ, որից հետո ՆԱՏՕ-ի բարձրագույն մարմինը հայտարարություն է տարածել Թուրքիային իր լիակատար աջակցության մասին: Ի դեպ, հայտարարության մեջ նշվում էր, որ խորհրդակցությունը գումարվել է Հյուսիսատլանտյան պայմանագրի 4-րդ հոդվածի պահանջով. այն է «անդամներից որևէ մեկի կողմից վտանգի գնահատման պայմաններում անհապաղ խորհրդակցության գումարել»: Խոսք չի գնում, սակայն, կոլեկտիվ պաշտպանություն ենթադրող 5-րդ հոդվածի գործարկման մասին:

http://armenpress.am/arm/news/695325/turqian-siriayi-dem-gortsoxutyunnerov-hayutyany-vnaselu.html