Թո’ղ 2013-ը Դիարբեքիրի պարիսպների տարի դառնա

Դիարբեքիրի տեղական օրակարգի 21 քաղաքների խորհուրդը (Diyarbakır Yerel Gündem 21 Kent Konseyi) արշավ է մեկնարկել` 2013 թ. Դիարբեքիրի պարիսպների տարի հռչակելու ուղղությամբ: Այդ մասին հաղորդում է Akunq.net-ը` հղում անելով պոլսահայ «Ակօս» պարբերականին:

Աղբյուրի փոխնացմամբ` Քաղաքային խորհուրդը և Դիարբեքիրի քաղաքապետ Օսման Բայդեմիրը հիշյալ արշավի կապակցությամբ հանդիպում են կազմակերպել լրագրողների հետ: Մամլո ասուլիսին Սուրի քաղաքապետ Աբդուլլահ Դեմիրբաշի հետ մեկտեղ մասնակցել են նաև խորհուրդը կազմող քաղաքացիական հասարակական կազմակերպությունների ներկայացուցիչներ:

Բայդեմիրը նշելով, թե «Դիարբեքիրում այսօր տեղի ունեցող դեպքերի պատճառով, ցավոք, տուժում են նաև պարիսպները», բոլորին կոչ է արել` աշխատանքներ կատարել Դիարբեքիրի պարիսպները պահպանելու և վերականգնելու համար, ինչպես նաև` դրանք ՅՈՒՆԵՍԿՕ-ի համաշխարհային ժառանգության ցանկում ընդգրկելու ուղղությամբ: Բայդեմիրը շեշտելով, որ Դիարբեքիրի պարիսպները և սույն քաղաքի մշակութային ժառանգությունը պահպանելը գլխավոր առաջնահերթություններից մեկն է, հավելել է. «Երբ հանրապետության մեծարգո նախագահը մեր քաղաք այցելեց, մեր կողմից առաջարկ հնչեց` Դիարբեքիրի պարիսպները պետական բարձր հովանու տակ առնելու վերաբերյալ: Անկեղծ ասած, այս առաջարկը հենց տեղում անմիջապես ընդունվեց, որից հետո մենք հարցի կապակցությամբ այցելեցինք նախագահական նստավայր: Մեր այցից անմիջապես հետո գործի անցանք, սակայն այն ավելի արագացնելու և կոնկրետ արդյունքների հասնելու, այսինքն` պարիսպների վերականգնումն սկսելու համար դինամիկա է պահանջվում: Թո’ղ 2013-ը դառնա Դիարբեքիրի, Դիարբեքիրի պարիսպների տարի»:

Բայդեմիրը ընդգծելով, որ «Եթե պարիսպներին պատշաճ ուշադրություն հատկացվի, և դրանք, ինչպես հարկն է, վերականգնվեն, ապա տարեկան առնվազն 3 միլիոն զբոսաշրջիկ կայցելի այստեղ», ասել է նաև, թե այդպիսով աղքատությունը կվերանա Դիարբեքիրում և շրջանում:

Արշավը կտարվի նաև www.diyarbakirsur.com կայքէջի միջոցով:

Akunq.net