Սահմանային միջադեպերի կրկնության դեպքում Թուրքիան պատրաստվում է ներխուժել Սիրիա՝ հակահարված հասցնելու

Աքչաքալեի միջադեպի վերաբերյալ Թուրքիայի վարչապետ Ռեջեփ Թայիփ Էրդողանի գլխավորությամբ կառավարության ընդլայնված կազմով նիստ է տեղի ունեցել, որի ընթացքում կարևոր որոշումներ են կայացվել, տեղեկացնում է Samanyolu haber-ը։

Ըստ այդմ՝ այսօր Թուրքիայի ազգային մեծ ժողովի (ԹԱՄԺ) հաստատմանը կուղարկվի մի փաստաթուղթ, որը թույլ կտա սահմանին ռազմական գործողությունների դեպքում մտնել Սիրիայի տարածք և պատասխան հարված հասցնել։

Կառավարությանը մոտ աղբյուրների փոխանցմամբ՝ իրենց նպատակը պատերազմը չէ, սակայն մտադիր են կանխարգելել իրենց սահմանի վրա իրականացվող հարձակումները։

Թուրքիայի օդուժը, սակայն, երեկ արդեն հակահարված է հասցրել Սիրիայի կառավարական ուժերի հենակետերին։ Օդ բարձրացած ռազմական ինքնաթիռները Սիրիայի սահմանին հետախուզական գործողություններ են ձեռնարկել։ Ուսումնասիրել են թիրախների կոորդինատները, որոնք գնդակոծվել են ավելի ուշ։

Սիրիայում մարդու իրավունքների ուսումնասիրության լոնդոնյան կենտրոնի տվյալներով՝ երեկ թուրքական կողմի ռմբակոծության հետևանքով Սիրիայի կառավարական զորքերը բազմաթիվ կորուստներ են կրել։ Ըստ սիրիացի ընդդիմադիրների՝ ռմբակոծվել է սահմանային մի զորամաս։

Դեռևս չհաստատված տեղեկություններ կան նաև այն մասին, որ այսօր՝ ժամը 06։00-ի տվյալներով, ռմբակոծությունը վերսկսվել է։

http://tert.am/am/news/2012/10/04/turkey-parliament-syria/