Թուրքահայ համայնքը վարչապետ Էրդողանի ելույթն ազգայնական է բնութագրել

Թուրքիայի իշխող Արդարություն եւ զարգացում կուսակցության` (ԱԶԿ) սեպտեմբերի 30-ին տեղի ունեցած հերթական համագումարում վաչապետ Ռեջեփ Թայիփ Էրդողանը հանդես է եկել «թուրք-իսլամական համադրմամբ ազգայնական հայտարարություններով», ինչը «թուրքահայերն ու թուրքաբնակ ոչ մահմեդականներն իրենց ուղղված վիրավորանք են գնահատում»: Այս մասին, ինչպես հաղորդում է «Արմենպրես»-ը, հայտարարել է, «Ակօս»-ի հայազգի խմբագրապետ Ռոբեր Քոփթաշը` թուրքական «Թարաֆ» թերթի հետ զրույցում: 

«Համագումարում ունեցած ելույթում, նշելով, որ ինքը «Թուրքիայի 75 մլն բնակչության կուսակցությունն» է, Էրդողանն ասաց. «Կիպրոսի եւ Ղարաբաղի հարցերում նույն կերպ կշարունակենք պրոակտիվ լուծում հարկադրող, խաղաղություն պարտադրող մեր սկզբունքային դիրքորոշումը: Դրա համար Հայաստանը, հայերը` անկախ ներսում, թե դրսում գտնվողները, պետք է իմանան, որ մինչեւ չիրագործվեն մեր ազերի եղբայրների իրավունքները, մենք որեւէ փոփոխություն չենք անելու Հայաստանի հետ հարաբերություններում»: Էրդողանը դրանով վերջակետ դրեց Աբդուլլա Գյուլի մասնակցությամբ ֆոտբոլային դիվանագիտությամբ սկսված եւ Ահմեդ Դավութօղլուի ստորագրած արձանագրություններով նախատեսվող Հայաստանի հետ հարաբերությունները բարելավելու քաղաքականությանը»,-վկայակոչելով վարչապետի խոսքերը` ասել է խմբագրապետը եւ ավելացրել. «Այսպիսով, հակառակ մինչ այժմ եղած պնդումներին, նա թուրք-հայկական հարաբերությունները կրկին պայմանավորեց Ղարաբաղի հարցի լուծմամբ` Հայաստանի հետ հարաբերությունները կարգավորելու առաջ դնելով նման մեծ նախապայման»:

Ռոբեր Քոփթաշը ընդգծել է, որ Կիպրոսի խնդրում Էրդողանը չի մտածում դադարեցնել հարաբերությունները Հունաստանի հետ, մինչդեռ Ադրբեջանի պատճառով նախընտրում է հարաբերություններ չունենալ Հայաստանի հետ: «Թուրքիայի վարչապետը երկակի ստանդարտներ է կիրառում», -ասել է Քոփթաշը` ավելացնելով, որ Թուրքիայի վարչապետը թուրքաբնակ հայերին չի ընդունում որպես հավասար քաղաքացիներ, իսկ նրա արած հայտարարությունն էլ ազգայնականներին է հիշեցնում:

http://armenpress.am/arm/news/694995/turqahay-hamaynqy-varchapet-erdoxani-eluytn-azgaynakan.html