«Հայ դյոնմեները (դավանափոխները) գաղտագողի կերպով հարձակում են գործում». թուրք պրոֆեսոր

Գազի համալսարանի հաղորդակցության ֆակուլտետի դասախոս, դոկտոր, պրոֆեսոր Նուրուլլահ Այդընը «Հայ դյոնմեները գաղտագողի կերպով հարձակում են գործում» վերնագրով հոդվածում իբրև թե փորձ է անում վերլուծել «Թուրքիայում հայկականության» խնդիրը, մինչդեռ հանդես է գալիս գիտնականին ոչ հարիր պատմական խեղաթյուրումներով և իր ազգակիցներին `Թուրքիայում բացահայտ կամ սքողված ինքնությամբ ապրող հայերի դեմ հրահրելով:

Այդ մասին հաղորդում է Akunq.net-ը` հղում անելով http://www.habervaktim.com լրատվական կայքին: Թուրքական աղբյուրի փոխանցմամբ` թուրք պրոֆեսորը մասնավորապես գրել է. «Նրանք (ծպտյալ հայերը-Ակունքի խմբ.) ունեն լրագրողի ինքնություն: Նրանք ունեն գիտնականի ինքնություն: Նրանք ունեն քաղաքական գործչի ինքնություն: Նրանք հանդես են գալիս քաղաքացիական հասարակական կազմակերպությունների ներկայացուցիչների անվան տակ»:

Նուրուլլահ Այդընն այնուհետև գրելով, թե օսմանյան շրջանում կարևոր պետական պաշտոններ զբաղեցրած հայերն իբր «ապերախտ են գտնվել թուրքերի հանդեպ և առանց որևէ պատճառի լցվել ատելության և վրեժխնդրության ծարավով, ներկայում շարունակում են գրքեր ու հոդվածներ հրապարակել, որոնցում թուրքերը մարդասպան են ներկայացվում», իր «գիտական վերլուծությունն» ավարտում է հետևյալ խոսքերով. «Նրանք մեր մեջ գտնվող դյոնմեներն են: Թեև թուրքական և մահմեդական անուններ են կրում, սակայն նրանց սրտերը լեցուն են ոխակալությամբ: (…) Թուրք ազգը պետք է լավ ճանաչի սադրիչ տիպերին»:

Akunq.net