Քառահարկ շենքի դիմաց` ընդամենը մեկ բնակարանի գումար

Վաքըֆների գլխավոր տնօրինությունը հայտարարել է, որ Գում Գափուի քառահարկ շենքի դիմաց, կառույց, որը պետք է վերադարձվի Գեդիքփաշայի հայ բողոքական եկեղեցու և դպրոցի վաքըֆին, կվճարվի ընդամենը մեկ բնակարանի գումարի չափով փոխհատուցում:
Այդ մասին հաղորդում է Akunq.net-ը` հղում անելով թուրքական «Վաթան» օրաթերթին: Աղբյուրի փոխանցմամբ` Վաքըֆների գլխավոր տնօրինությունը այս քառահարկ շինության համար, որը 8 բնակարան է ընդգրկում, սահմանել է ընդամենը 147 հազար 143 լիրայի չափով դրամական փոխհատուցում: Գեդիքփաշայի հայ բողոքական եկեղեցու և դպրոցի վաքըֆը բողոքարկելու է այդ որոշումը:
Գեդիքփաշայի հայ բողոքական եկեղեցու և դպրոցի վաքըֆի նախագահ Գրիգոր Աղաբալօղլուն «Վաթան»-ի հետ զրույցում նշել է. «Մեզ տրվելիք փոխհատուցումը շատ ծիծաղելի է: Բոլորը գիտեն Ստամբուլում, որ Գում Գափուում տները թանկ են: Այստեղ մեկ բնակարանը 150 հազար լիրայով է վաճառվում: Դժվարանում ենք հասկանալ, թե պետությունն ինչպես է այդ գինը սահմանել: Պետությունը 30 տարի շարունակ այստեղի վարձն է ստացել, վաճառել և գումար վաստակել: Նրանք պետք է Աստծուց վախ ունենան: Այս կառույցը պահանջել ենք դեռևս 5-6 տարի առաջ, երբ հրապարակվեց բարեփոխումների սկիզբը դարձած 4771 թվակիր օրենքը: Սակայն չտվեցին: Հետո, չնայած որ դատական գործ էինք հարուցել, շենքը հապշտապ վաճառվեց ոմն Մուրադ Ասլանի: Մենք հարուստ վաքըֆ չենք: Ընդամենը 5 ունեցվածք ունենք: Երկուսը տրվել է, երրորդը մնում է: Մեր դպրոցների տեղում ավտոկանգառ կառուցվեց, որը հիմա աշխատեցվում է մեր վաքըֆի կողմից: Ունենք 2 շենք և որբատուն` Թուզլայում»:
Գրիգոր Աղաբալօղլուն «Վաթան»-ի հետ զրույցում նաև հիշեցրել է, որ Թուզլայի որբանոցում են մեծացել Հրանտ Դինքը և նրա կինը` Ռաքել Դինքը:

Akunq.net