Համակողմանի վերականգնումից հետո այսօր վերաօծվել և պատարագների համար վերաբացվել է Օրաթաքյոյի Սուրբ Աստվածածին եկեղեցին: Մոտ մեկ ու կես տարի փակ մնացած եկեղեցում կատարված աշխատանքները չեն խաթարել նրա պատմական տեսքը:
Այդ մասին հաղորդում է Akunq.net-ը` հղում անելով պոլսահայ «Ակօս» շաբաթաթերթին: Օրթաքյոյի վաքըֆի նախագահ Իսքենդեր Շահինգյոզը, պատասխանելով «Ակօս»-ի հարցերին, հայտնել է, որ թեև իրենք սկզբում են ցանկացել են սովորական վերանորոգում անել, սակայն տեսնելով, որ եկեղեցին պատկերացվածից շատ ավելի վատ վիճակում է, կատարել են համակողմանի վերականգնում: «Նկատեցինք, որ եկեղեցու շենքը կանգնած է փլվելու վտանգի առաջ: Եթե չվերականգնվեր, կառույցը կարող էր մեկ-երկու տարվա մեջ փլվել: Հետևաբար, աշխատանքների շրջանակը լայնացվեց»,-«Ակօս»-ին տված հարցազրույցում նշել է Շահինգյոզը:
Օրթաքյոյի վաքըֆի նախագահը նաև հաղորդել է, որ իրենք եկեղեցու վերականգման աշխատանքներին մասնակից են դարձրել նաև Հայաստանի վարպետների. «Նախապատվություն տվեցինք մեր եկեղեցու ոգուն հաղորդակից անձանց: Նաև մեր հոգևորականների առաջարկով, Հայաստանից հրավիրեցինք փայտի փորագրության վարպետ Խաչիկ Կիրակոսյանին: Խորանը, դպրաց դասի հատվածը և փայտե դռները` վրայի պատկերազարդումները ներառյալ, ձեռքով արված աշխատանքներ են: Յուրաքանչյուր դետալ նորոգվել է խիստ բծախնդրորեն»:
Շահինգյոզը հայտնելով, որ եկեղեցին ընդհանուր առմամբ 480 օր է փակ եղել, «Ակօս»-ի հետ զրույցում ասել է. «Հայցում ենք համայնքի յուրաքանչյուր անդամի ներողամտությունը` իրենց այսչափ ժամանակ առանց եկեղեցի թողնելու համար, սակայն հենց դրա շնորհիվ մեր եկեղեցին կպահպանվի ապագայում»:
Akunq.net
Leave a Reply