Թուրքիայում դպրոցները վերածվում են կրոնական ուսումնական հաստատությունների

Բարեփոխումների դեմ են հադես գալիս ծնողներն ու ուսուցիչները, սակայն կառավարությունը չի նախատեսում հետ կանգնել կրթական համակարգում փոփոխությունների ծրագրերից:

Թուրքիայի բազմաթիվ դպրոցականների ծնողների համար այս տարի անակնկալ է դարձել այն, որ իրենց երեխաների դպրոցները նոր ուսումնական տարվանից վերածվել են «իմամ-հաթիբների»՝ կրոնական ուսումնական հաստատությունների:

Նման փոփոխությունները մաս են կազմում այս երկրում ուսումնական համակարգի անցկացվող բարեփոխումների, որոնք իրականացնում է Թուրքիայի մահմեդականամետ կառավարությունը:

Որոշ ծնողներ դեմ են հանդես գալիս դպրոցները կրոնական ուսումնական հաստատությունների վերածելու, սակայն ոմանք ողջունում են կառավարության նման քայլերը՝ ասելով, որ «մենք մահմեդական երկիր ենք, հետևաբար կրոնը պետք է ընդգրկված լինի ուսումնական պլանում»:

Ստամբուլի «իմամ-հաթիբ» տեսակի կրոնական ուսումնական հաստատություններից մեկում, որը հիմնադրվել է իմամներ պատրաստելու նպատակով, սովորել է Թուրքիայի ներկայիս վարչապետ Ռեջեփ Թայիփ Էրդողանը: Այս տեսակի դպրոցների ուսումնական պլանն այժմ ընդգրկում է սովորական կթական ծրագիրը, ինչպես նաև կրոնի ուսումնասիրություն, որին հատկացվում է մի քանի ժամ:

«Իմամ-հաթիբ» տեսակի դպրոցները դրանց ստեղծման ժամանակից՝ 1950-ական թվականներից սկսած դարձել են բանավեճի աղբյուր, քանի որ Թուրքիան համարվում է աշխարհիկ պետություն: Նման բազմաթիվ դպրոցներ փակվել են 1990-ականներին, երբ աշխարհիկ պետություն պահպանելու կողմ հանդես եկող զինված ուժերը բռնություններ են գործադրել երկրում թափ հավաքող իսլամիստական շարժման ներկայացուցիչների նկատմամբ:

Թուրքիայում իշխանության գլուխ կանգնած կուսակցությունն այս տարվա սկզբին մեծ ջանքեր է գործադրել, որպեսզի կառավարությունն ընդունի երկրի դպրոցներում կրթական բարեփոխումներ անցկացնելու մասին մի օրենք, որը թույլ է տալիս դպրոցներին մասնագիտանալ կրոնական կրթության ոլորտում՝ միաժամանակ դասավանդելով ժամանակակից ուսումնական պլանով նախատեսված առարկաներ: Նման որոշումը հրահրել է երկրի աշխարհիկ բնակչության և ուսուցիչների բողոքի ցույցեր: Վերջիններս պնդում են, որ այս օրենքը առաջ է քաշում իսլամիստական գաղափարախոսությունն ու վտանգում է կրթական ստանդարտները:

Թուրքիայի վարչապետ Ռեջեփ Թայիփ Էրդողանը սակայն քննադատության է ենթարկել «իմամ-հաթիբ» դպրոցների և դրանց թվի ավելացման դեմ բողոքողներին, իսկ երկրի կրթության նախարարն ասել է, թե «բարեփոխումների ընդդիմախոսները սատարում են ահաբեկչությունը կամ մոլի աշխարհականներ են»:

Նման քննարկումները վկայում են այն մասին, որ կրթության ոլորտը Թուրքիայի բևեռացած հասարակության համար կարող է դառնալ ևս մեկ «մարտադաշտ»:

Արմեն Հովհաննիսյան

Ամերիկայի ձայն

http://www.aravot.am/2012/09/27/114086/

Leave a Reply

Your email address will not be published. Required fields are marked *

Վերջին Յաւելումներ

Հետեւեցէ՛ք մեզի

Օրացոյց

September 2012
M T W T F S S
 12
3456789
10111213141516
17181920212223
24252627282930

Արխիւ