Թուրք հայտնի երգիծաբան Ազիզ Նեսինի որդին` Աթեշ Նեսինը, http://www.sebinmedya.com կայքում իր տպավորություններն է կիսել, որ ստացել է իր ծննդավայր Շապին Կարահիսար կատարած եռօրյա ուղևորությունից:
Նոթերն սկսելով Շապին Կարահիսարի մասին պատմական համառոտ ակնարկով և այն շեշտադրմամբ, թե իր հոդվածը թերևս դուր չի գա շատ հայրենակիցների, Աթեշ Նեսինը գրում է.
«1895 թ. դրությամբ Շապին Կարահիսարի կենտրոնի բնակչության մեկ երրորդը բաղկացած էր հայերից: Պատմական տեղեկությունների համաձայն` 1901 թ. քաղաքում կային 2 հայկական դպրոցներ, որոնցում ուսանում էին 332 տղա և 105 աղջիկ աշակերտներ: Առաջին համաշխարհային պատերազմի ժամանակ Շապին Կարահիսարի հայերը, որոշելով դիմադրություն ցուցաբերել Հայոց տեղահանության մասին որոշմանը, կանանց և երեխաների հետ մեկտեղ ապաստանել են Շապին Կարահիսարի մի հայտնի պատմական բերդում, որն ասում էին, թե հռոմեացիներից է մնացել: 25 օր տևած դիմադրության ընթացքում հարձակումների ժամանակ թուրքական ռազմական ուժերից 84 զոհ և 140 վիրավոր է արձանագրվել, իսկ մուսուլման ժողովրդից` 30 զոհ և 20 վիրավոր: 1915 թ. հուլիսի 3-ին բերդը հայ ըմբոստներից հետ վերցնել հաջողած թուրքական բանակն ավանն ու շրջակայքը լիովին մաքրել է հայ բնակչությունից… Այն օրվա պայմաններում հապշտապ կայացված որոշումների ծանր հետևանքների պատճառով, որոշումներ, որոնք, կարծում էինք, թե կլուծեն մեր խնդիրները, և որոնք հետագայում մեծ գլխացավանք դարձան մեզ համար, հետագա տարիներին, որպես ազգ, ստիպված եղանք ժամանակ առ ժամանակ դրանց նեղությունն ու բեռը քաշել: Այնինչ, եթե ժամանակին ավելի ռացիոնալ լուծումներ գտնվեին, թե անցյալում և թե մեր օրերում չէինք կանգնի հիմիկվա ողբերգական դեպքերի առաջ և այսօր չէինք վտանգի մեր երկրի ապագան»:
Akunq.net
Leave a Reply