Թուրքիայի վարչապետ Ռեջեփ Թայիփ Էրդողանը հայտարարել է, որ մտադիր է երկրում խաղաղություն հաստատելու շուրջ շարունակել Քուրդիստանի աշխատավորական կուսակցության (PKK) հետ անցյալ տարի Օսլոյում սկսված բանակցությունները, որն ընդհատվել էր Անկարայի մեղքով:
Ինչպես հաղորդում է «Արմենպրես»–ը` վկայակոչելով «Անատոլու» լրատվական գործակալությունը, թուրքական Kanal 7 եւ Ulke TV հեռուստաալքներին տված հարցազրույցում Էրդողանն ասել է, որ իրենց գլխավոր նպատակը «երկու կողմից զենքերը վայր դնելն է»: «Մեր գլխավոր ցանկությունը զենքերը վայր դնելն է: Զենքը ձեռքում եղած ժամանակ այն միշտ էլ կարող է կրակել: Մենք կողմնակից ենք երկու կողմից էլ զենքը վայր դնելուն», -ասել է նա:
Այն հարցին, թե հնարավո՞ր են PKK-ի ներկայացուցիչների հետ բանակցությունները, ինչպես դա անցյալ տարի տեղի էր ունեցել Օսլոյում, Էրդողանն ասել է. «Իմրալիի հետ (PKK-ի ցմահ բանտարկված առաջնորդ Աբդուլլա Օջալանի) նոր բանակցությունները չեն բացառվում»:
Թուրքիայի ղեկավարությունն ազգային հետախուզական կազմակերպության խորհրդական Ֆիդանի միջոցով անցյալ տարի Օսլոյում բանակցություններ էր անցկացրել Օջալանի վստահված անձանց հետ, ինչը հանրությունից գաղտնի էր պահվել: Սակայն, որոշ ժամանակ անց, բանակցությունների մասին հայտնի էր դարձել Թուրքիայի գլխավոր ընդդիմադիր Ժողովրդահանրապետական կուսակցությանը, որն էլ խստորեն քննադատել էր Էրդողանին:
Դրան ի պատասխան` Էրդողանը հայտարարել էր, որ բանակցություններն անհրաժեշտ են երկրում խաղաղություն, հաշտություն եւ հանգստություն հաստատելու համար:
Շուրջ 30 տարի PKK-ն պայքարում է Թուրքիայում քրդերի իրավունքները վերականգնելու եւ քրդական ինքնավարություն ստեղծելու համար: PKK-ի պարտիզանական պայքարը ճնշելու համար թուրքական անվտանգության ուժերի հետ բախումներում մինչ այժմ 40 հազարից ավելի մարդ է զոհվել:
http://armenpress.am/arm/news/694426/erdoxany-mtadir-e-sharunakelbanakcutyunnery-pkk-i-het.html
Leave a Reply