Հնարավոր է` Թուրքիայում անվանափոխված վայրերին վերադարձնեն նախկին անունները

Առաջիկա երկուշաբթի մեկնարկող ԹԱՄԺ-ի նոր նստաշրջանում, հնարավոր է, քննարկվի 1930-ական թվականներից սկած անվանափոխված նահանգներին և գավառներին նախկին տեղանունները վերադարձնելու հարցը:
Այդ մասին հաղորդում է պոլսահայ Ակօս շաբաթաթերթը: Աղբյուրի տեղեկացմամբ` անվանափոխված վայրերի նախկին անվանումները վերականգնելու վերաբերյալ դիմումները քննած Թուրքիայի մեջլիսի Ներքին գործերի հանձնաժողովը խնդրին առնչվող առաջակները ներկայացրել է վարչապետ Էրդողանին: Վերջինս էլ պատասխանել է, թե նախապատրաստական աշխատանքներից հետո այդ բոլոր տեղանունները կանվանափոխվեն: Եթե այդ առաջարկներն օրենքի ուժ ստանան, Թունջելին կդառնա Դերսիմ, Գյուրօյմաքը` Նորշին, Այդընլարն էլ` Թիլո:
“Յենի Շաֆաք” օրաթերթի փոխանցմամբ` Արդարություն և զարգացում կուսակցության անդամ Մուամեր Գյուլերի նախագահության տակ գործող ԹԱՄԺ-ի Ներքին գործերի հանձնաժողովը կմեկտեղի այդ հարցով ստացված բոլոր դիմումները և դրանք կբերի մեջլիսի օրակարգ:
Հանձնաժողովին առաջարկ ներկայացրած Արդարություն և զարգացում կուսակցության` Բիթլիսի պատգամավոր Վահիթ Քիլերը պահանջել է, որ Բիթլիս /Բաղեշ-Ակունքի խմբ./ նահանգի Գյուրօյմաք գավառին վերադարձվի Նորշին անվանումը` իր պահանջը հիմնավորելով այն փաստով, թե հենց այդ անվամբ է այն հիշատակել նաև Մուստաֆա Քեմալ Աթաթուրքը:
Վարչապետ Էրդողանի` անցյալ տարի Դերսիմի կոտորածի համար հայտնած ներողությունից հետո, Խաղաղություն և ժողովրդավարություն կուսակցության ներկայացուցիչ Սեբահաթ Թունջելի ստորագրությամբ դիմում է տրվել նաև Թունջելի վերանվանված սույն նահանգին նախկին անվանումը վերադարձնելու մասին:

Akunq.net