Եվգենի Կիսինը Թուրքիայի հրավերները չի ընդունում, քանի որ նրանք չեն ճանաչել Հայոց ցեղասպանությունը

Հայտնի դաշնակահար Եվգենի Կիսինը, սեպտեմբերի 25–ի մամուլի ասուլիսում ուրախություն հայտնելով, որ 28 տարվա մեջ առաջին անգամ է Հայաստանում, ասել է, որ ինքն ամեն երկրի հրավեր չէ, որ ընդունում է։

«Կան երկրներ, որոնցից հրավերներ ես չեմ ընդունում ելնելով քաղաքական, իսկ երբեմն այլ դրդապատճառներից։ Օրինակ, ես չեմ գնում Թուրքիա՝ չնայած բազմաթիվ հրավերներ եմ ստանում, այն բանի պատճառով, որ նրանք չեն ճանաչել Հայոց ցեղասպանությունը։ Չեմ գնում նաև Չինաստան, քանի որ ծնվել ու 20 տարի ապրել եմ այդ Կարմիր դրոշի ներքո»,– ասել է Եվգենի Կիսինը։

Հիշեցնենք, որ 2009թ. Երուսաղեմում անցկացված «Եվրոպական և Իսրայելական երկխոսություն» թեմայով կոնֆերանսի ժամանակ թուրքամետ զեկուցողից հետո Եվգենի Կիսինը խոսքի իրավունք է խնդրել և համապատասխան հակահարված է տվել բոլոր այն պնդումներին, թե ժամանակակից Թուրքիային պետք է մտցնել Եվրամիություն։ Որպես փաստարկ, նա բաց տեքստով բոլոր ներկաներին հիշեցրել է Հայոց ցեղասպանության մասին, նշելով, որ, եթե ժամանակին Գերմանիան հերքեր Հոլոքոսթը, ապա նրան չէին ընդունի միջազգային ոչ մի կառույցի կազմում։

Նշենք, որ «Երևանյան հեռանկարներ» 13-րդ միջազգային փառատոնի շրջանակում հայտնի դաշնակահար Եվգենի Կիսինը սեպտեմբերի 27-ին հանդես կգա համերգային ծրագրով՝ ներկայացնելով Հայդն, Բեթհովեն, Շուբերտ և Լիստ:

http://emedia.am/hy/1348664013