Արևմտյան Հայաստանի պատմական եկեղեցիները շարունակում են որպես գոմ օգտագործվել տեղի բնակիչների կողմից

Վանի Գևաշ գավառակից 83 կմ հեռավորության վրա գտնվող Անաքյոյ (Խուրիտիս) գյուղի` հայերից մնացած պատմական եկեղեցիները որպես գոմ են օգտագործվում:

Այդ մասին հաղորդում է Դիջլե լրատվական գործակալությունը: Աղբյուրի փոխանցմամբ` հիշյալ գյուղում գտնվող եկեղեցիներից մեկը, որը ժամանակին հոգևորականների է կրթել, ներկա պահին որպես անասնագոմ է ծառայում:

1915 թ. Ցեղասպանության պատճառով դատարկված այս գյուղում բնակություն են հաստատել Բահչեսարայից, Ջիզրեից և Էրուհից գաղթած քրդեր: Անաքյոյ (Խուրիտիս) գյուղում կան հայերից մնացած մի քանի պատմական եկեղեցիներ: Ներկայում այստեղ ընդամենը 26 տուն ընտանիք է ապրում: 1994 թ. ռազմական գործողությունների հետևանքով հրկիզված այս գյուղում հրդեհի են մատնվել նաև տներ, ախոռներ և հայերին պատկանած պատմական հուշարձաններ: Հայերի` չհրկիզված պատմական հուշարձաններն էլ տեղի գյուղացիների կողմից որպես գոմ և հավաքատեղի են օգտագործվում:

Այստեղի հայկական եկեղեցիներից մեկում հայերեն գրություններ են պահպանվել, իսկ մյուս եկեղեցիների և վանքերի մեջ ու շրջակայքում կարելի է հոգևորականների գերեզմանների հանդիպել:

Akunq.net